ភ្នំពេញ ៖ ជនសង្ស័យ២នាក់ ស្នាក់នៅក្នុងវត្តទួលអស់លោកសង្ឃដាច់យ៉ៃ បានចេញធ្វើសកម្មភាព លួចម៉ូតូមួយគ្រឿងម៉ាកនិច បានហើយជិះចេញមក ក៏ជួបនិងជនរងគ្រោះ ស្ទាក់ចាប់ជនសង្ស័យបាន វាយម្នាក់មួយដៃមួយជើងទ្រោមខ្លួនទើប ទាក់ទងទៅសមត្ថកិច្ចមកយកទៅប៉ុស្តិ៍ដើម្បីសួរនាំ ។
ហេតុការណ៍នេះបង្កឲមានការភ្ញាក់ផ្អើល កាលពីវេលាម៉ោង ១១និង០០នាទីព្រឹកថ្ងៃទី ២៣ មីនា ២០២១ នៅចំណុចផ្ទះជាងជួសជុលម៉ូតូ មួយកន្លែងស្ថិតនៅតាមផ្លូវ១០៣ ក្រុម៧ ភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ ។
តាមប្រភពពីកន្លែងកើតបានដឹងថា មុនពេលកើតហេតុ ម៉ូតូម៉ាកនិចមួយគ្រឿងខាងលើនេះ មានស្លាកលេខ ភ្នំពេញ1BU-1896ពណ៌ផ្កាឈូក ជាម៉ូតូរបស់ជាងម៉ូតូដែលគាត់ដាក់នៅក្បែរតូបជាងជួសជុលដោយមិនបានដកសោចេញពីម៉ូតូ ដល់ម៉ោងខាងលើក៏មានជនសង្ស័យ២នាក់ខាងលើដើរឃើញ ក៏ឡើងជិះចេញ បានបន្តិច ស្រាប់តែកូនជាងជួសជុលម៉ូតូក្រឡេកឃើញទាន់ដេញតាម រហូតចង្ងាយជាង១០០ម៉ែត្រពីកន្លែងកើតហេតុ ក៏ទាន់ចាប់បានវាយទ្រោមតែម្តង ទើបរាយការណ៍ទៅកាន់សមត្ថកិច្ចប៉ុស្តិ៍ទួលសង្កែទី២ មកយកទៅសួរនាំ។
ជនសង្ស័យទី១មានឈ្មោះ ឃួន ភារ៉ា ភេទប្រុស អាយុ ១៨ឆ្នាំ មុខរបរកូនសិស្សលោកសង្ឃ ទី២ឈ្មោះ ចាន់ សុខ អាយុ ១៨ឆ្នាំ មុខរបរកូនសិស្សលោកសង្ឃ ទាំង២នាក់ស្នាក់នៅក្នុងវត្តទួលអស់លោក សង្កាត់គីឡូម៉ែត្រលេខ៦ ខណ្ឌឬស្សីកែវ ។
បើតាមការសាកសួរផ្ទាល់ពីជនសង្ស័យ បានប្រាប់ឲ្យដឹងថា ពួកខ្លួនទាំង២នាក់ ជាកូនសិស្សលោក ស្នាក់ក្នុងវត្តទួលអស់លោក សង្កាត់គីឡូម៉ែត្រ៦ មុនពេលក់តហេតុពួកគេបានដើរចេញពីវត្តមក ខណៈមកដល់កន្លែងជាងជួសជុលម៉ូតូមួយកន្លែង ក៏ឃើញម៉ូតូម៉ាកនិច ខាងលើទុកសោរនៅជាប់ម៉ូតូ ក៏ឡើងជិះចេញមកបានបន្តិច ក៏ត្រូវជនរងគ្រោះតាមទាន់និងវាយទ្រោមតែម្តង ។
បច្ចុប្បន្នជនសង្ស័យទាំង២នាក់ ត្រូវបានសមត្ថកិច្ច នាំខ្លួនទៅកាន់ប៉ុស្តិ៍នគរបាលរដ្ឋបាល សង្កាត់ទួលសង្កែទី២ ដើម្បីសួរនាំនិងកសាងសំណុំរឿងនិងទទួលពាក្យបណ្តឹងជនរងគ្រោះ ចាត់ការតាមនីតិវិធីច្បាប់៕ រក្សាសិទ្ធិដោយ ៖ សារឿន
