ភ្នំពេញ ៖ មហាជនជាច្រើន ជាអ្នកប្រើប្រាស់បណ្តាញសង្គម ពិតមានការភ្ញាក់ផ្អើលជាខ្លាំង ក្រោយឃើញលោក ឌួង ឆាយ បានសម្រេចចិត្តទៅសាងព្រះភ្នួសបែបនេះ ក្រោយកើតមានរឿងរ៉ាវបែកបាក់ជីវិតគ្រួសារដ៏កក្រើក និងក៏ជាវេលាចុងក្រោយ នៃការហែកហួរគ្នាពីជីវិតគ្រួសារឲ្យមហាជនដឹងឮសឹងគ្មានសឹងសល់។
តែយ៉ាងណា បើតាមការបញ្ជាក់ឲ្យដឹងពីសាម៉ីខ្លួន ឌួង ឆាយ នោះការសម្រេចចិត្តបួសនេះ ដែលធ្វើឡើងនៅក្នុងវត្តមុនីប្រសិទ្ធីវង្ស ស្ថិតនៅក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ កាលពីថ្ងៃទី២១ ខែមីនា ឆ្នាំ២០២១ គឺទី១បួសលាងជម្រះកម្មពៀរដែលខ្លួនបានសាងនូវកំហុសឆ្គងជាច្រើន និងទី២ គឺបួសសងគុណឪពុកម្តាយផងដែរ។
លុះមកដល់ថ្ងៃទី២២ ខែមីនា ឆ្នាំ២០២១ ម្សិលមិញនេះ ព្រះសង្ឃ ឌួង ឆាយ ក្រោយបួសបានមួយថ្ងៃ ហាក់យល់ដឹងបានខ្លះពីផ្លូវព្រះធម៌ ក៏បានបង្ហោះភ្ជាប់រូបថត១សន្លឹក អមនឹងសារមានសង្ឃដីកាយ៉ាងដូច្នេះថា៖ «ញុំព្រះករុណាអាត្មាភាព ឌួង ឆាយ បានយល់ច្បាស់អំពីបញ្ហាដែលបានកើតមានកន្លងមក កើតឡើងដោយកិលេស កើតឡើងដោយកំហឹង ដោយហេតុសត្វលោកល្ងង់ខ្លៅ វង្វេងក្នុងវាលវដ្តសង្សា ពេលនេះអាត្មាភាពមានសទ្ធាជ្រះថ្លាក្នុងព្រះពុទ្ធសាសនា មានតែផ្លូវនៃព្រះធម៍ទេទើបអាចបំបាត់អស់សៅហ្មងទាំងពួង។ កាលវេលាដ៏មហាប្រសើរនេះអាត្មាភាពសូមបិណ្ឌបាតនូវមន្ទិលសៅហ្មងក្នុងចិត្តញោមគ្រប់ៗគ្នា ក្នុងរឿងបញ្ហាជីវិតរបស់អាត្មាភាព និងកំហុសរបស់អាត្មាភាពនាពេលកន្លងមក សូមអោយកិលេសទាំងពួងរំងាប់ដោយធម៌ រលត់ដោយការអហោសិកម្មចាប់ពីពេលនេះតទៅ។ ខ្ញុំព្រះករុណាអាត្មាភាពសូមថ្វាយប្រគេននូវមហាកុសលដ៏ជ្រះថ្លានេះ ថ្វាយ ប្រគេនព្រះករុណាគ្រប់ព្រះអង្គ និងញោមញាតិគ្រប់រូប សូមជៀសផុតពីការរាតត្បាតនៃមេរោគកូវីដ ១៩ ជួបតែសុខ ជួបតែចម្រើនដរាបតទៅ ឌួង ឆាយ»។
ដោយឡែក ក្រោយពីបានឃើញសារយ៉ាងប្រពៃបែបនេះ របស់លោកបង ឌួង ឆាយ តារាហ្វេសប៊ុកដ៏ល្បីឈ្មោះ កាកាអូស្ត្រាលី ព្រោះតែទប់អារម្មណ៍លែងជាប់ ក៏បានស៊ែរផុសនេះ ហើយពោលពាក្យបែបនេះថា៖ «ករុណាសូមឲ្យលោកបង Duong Chay ឌួង ឆាយបានស្ងប់អារម្មណ៍ ដោយការគោរពប្រតិបត្តិព្រះធម៌ សូមឲ្យកុសលផលបុណ្យទាំងឡាយជួយឲ្យលោកបងរួចផុតទុក្ខ ការពិតយ៉ាងណាមានតែព្រះទេដែលទ្រង់ត្រាស់ដឹង ដូច្នេះបើសិនជាករុណាទាំងអស់គ្នា បានគិតនិងវិភាគខុសឆ្គងទៅលើលោកបងសូមឱ្យលោកបងអាហោសិកម្មឱ្យករុណាទាំងអស់គ្នាផងទៅចុះ ករុណាសូមថ្វាយបង្គំលោកបងពីចម្ងាយ បើទាំងអស់គ្នាតាំងខ្លួនជាអ្នកមានជំនឿគោរពព្រះពុទ្ធសាសនា កុំសើចកុំយំទៅលើបុគ្គលដែលជាព្រះសង្ឃ ដែលតាំងចិត្តលះបង់ដើម្បីប្រតិបត្តិព្រះធម៌ជាមួយនឹងចិត្តបរិសុទ្ធជ្រះថ្លា សូមឲ្យមានចិត្តបរិសុទ្ធជ្រះថ្លាទាំងអស់គ្នា ជីវិតមនុស្សលោកទាំងឡាយពោរពេញដោយសេចក្តីសុខ ពេលណាចេះមានមេត្តាចំពោះគ្នា សាធុ សាធុ សាធុ។ កាកាអូស្ត្រាលី-ᴋᴀᴋᴀ ᴋʜ ᴀᴜsᴛʀᴀʟɪᴀ»៕ រក្សាសិទ្ធិដោយ៖ លឹម ហុង
