ភ្នំពេញ ៖ ពីរនាក់ប្តីប្រពន្ធរួមនិងកូនប្រុសអាយុ៤ឆ្នាំម្នាក់មកស្នាក់នៅបន្ទប់ជួល ប្រកបមុខរបរប៉ះកង់ពេលយប់និងប្រពន្ធជាអ្នកអនាម័យ ត្រូវបានលោកចោរគ្មានក្តីមេត្តាលួចយកម៉ាស៊ឺនបូមខ្យល់ សម្រាប់ប៉ះកង់និងរ៉ឺម៉កសណ្តោងម៉ូតូរបស់គាត់យកទៅបាត់។ ពេលនេះពួកគាត់ត្អូញថា៖ដាច់បាយហើយ។
ប្តីប្រពន្ធទាំងពីរនាក់ខាងលើ៖ ប្តីមានឈ្មោះ នូវ កក់ ហៅ ជាង ម៉ៅ អាយុ៣៩ឆ្នាំ មុខរបរប៉ះកង់ ស្នាក់នៅបន្ទប់ជួលម្តុំផ្លូវ២០០៤ភូមិត្រពាំងឈូក សង្កាត់ទឹកថ្លា ខណ្ឌសែនសុខ។
ចំណែកប្រពន្ធមានឈ្មោះ ជួប ហឿន អាយុ៤៣ឆ្នាំមុខរបរ អ្នកអនាម័យស្នាក់នៅបន្ទប់ជួលជាមួយគ្នា។
បើតាមការរៀបរាប់ពីជនរងគ្រោះទាំង២នាក់ប្តីប្រពន្ធបានប្រាប់អង្គភាពCENឲ្យដឹងថា នៅវេលាម៉ោង៨យប់ថ្ងៃទី២២ខែមីនាឆ្នាំ២០២១ រូបគាត់បានដឹកម៉ាស៊ឺនបូមខ្យល់តាមរ៉ឺម៉កសណ្តោងម៉ូតូចេញទៅចតមុខផ្សារឡាក់គី ម្តុំផ្លូវ២០០៤ អង្គុយរងចាំប៉ះកង់ដូចសព្វដង លុះនៅវេលាម៉ោងយប់ថ្ងៃដដែលដោយសារស្ងាត់ម៉ូយពេក ក៏បានដឹកម៉ាស៊ឺនបូមខ្យល់ត្រឡប់មកចតទុកនៅមុខបន្ទប់ជួលវិញ ហើយក៏បានចូលទៅដេកបាត់។
លុះនៅម៉ោង៦ព្រឹកថ្ងៃទី២៣ខែមីនាឆ្នាំ២០២១ រូបគាត់បានក្រោកពីដេកវិញដើរមកមើលរ៉ឺម៉កនិងម៉ាស៊ឺនបូមខ្យល់អត់ឃើញ ទើបមានការផ្អើលឆោរឡោទាំងព្រឹក ហើយក៏បានសុំមើលកាំម៉ារ៉ាសុវត្ថិភាពនៅម្តុំនោះ ក៏ឃើញជនសង្ស័យ២នាក់ជិះម៉ូតូម៉ាកវ៉េវមួយគ្រឿងមកធ្វើសកម្មភាពលួចរ៉ឺម៉កសណ្តោងម៉ូតូនិងម៉ាស៊ឺនបូមខ្យល់របស់គាត់។
ពួកគាត់បានបន្តឲ្យដឹងទៀតថា៖ គាត់បានលក់គោដែលម៉ែចែកឲ្យយកមកទិញម៉ាស៊ឺនបូមខ្យល់ដើម្បីរកស៊ីចិញ្ចឹមក្រពះ និងកូនប្រុសអាយុ៤ឆ្នាំម្នាក់ទៀត ចំណែកប្រពន្ធធាក់កង់ទៅធ្វើការអានាម័យនៅជិតសាលាបាក់ទូកឥឡូវកូវីដ ១៩ វាយលុកខ្លាំងពេកថៅកែឲ្យផ្អាកការងារមួយរយៈសិន ពេលនេះមុខរបរប៉ះកង់ត្រូវចោរបញ្ចប់ទៀត បានលុយពីណាបង់ថ្លៃបន្ទប់ជួលនិងទិញបាយអាហារសម្រាប់ហូប។
បច្ចុប្បន្នរូបគាត់ទាំង២នាក់ប្តីប្រពន្ធបានទៅដាក់ពាក្យបណ្តឹង នៅប៉ុស្តិ៍រដ្ឋបាលសង្កាត់អូរបែកក្អមឲ្យជួយរកម៉ាស៊ឺនបូមខ្យល់និងរ៉ឺម៉កសណ្តោងឲ្យគាត់វិញផង៕ រក្សាសិទ្ធិដោយ៖សួង សាម
