បុរសម្នាក់នៅរដ្ឋ Kerala (ឥណ្ឌា) កំពុងត្រូវបានគេកោតសរសើរជាវីរបុរស សម្រាប់ការជួយសង្គ្រោះជីវិតបុរសម្នាក់ ដែលទំនងជាខ្យល់គរដួល និងធ្លាក់ចេញពីជាន់ទី២ នៃអគារធនាគារដែលពួកគេទាំងពីរកំពុងស្ថិតនៅ។
ហេតុការណ៍នេះបានកើតឡើងនៅសាខា Vadakara នៃធនាគារ Kerala ប្រទេសឥណ្ឌា កាលពីថ្ងៃទី១៩ ខែមីនា ឆ្នាំ២០២១។ ហើយរូបភាពវីដេអូនៃឧប្បត្តិហេតុនេះ ក៏កំពុងតែរាលដាលយ៉ាងល្បឿននៅលើបណ្តាញសង្គមផងដែរ។
នៅក្នុងវីដេអូគេអាចឃើញបុរស២នាក់ ឈរនៅតាមសាលផ្លូវដើរនៅជាន់ទី២ នៃអាគារ ខណៈពួកគេកំពុងផ្អែកខ្លួនទៅនឹងជញ្ជាំងថ្មយ៉ផ្លូវដើរ។ ប៉ុន្តែ បន្ទាប់ភ្លាមៗនោះ បុរសម្នាក់ដែលស្ថិតក្នុងសម្លៀកបំពាក់អាវក្រហម និងខោស ស្រាប់តែស្រុតជើង ហើយផ្ងាកខ្លួនពីលើបង្កាន់ដៃថ្ម ហើយប៉ះជើងធ្លាក់ចេញតែម្តង។
ទោះជាយ៉ាងណា រំភេចនោះបុរសដែលឈរក្បែរគាត់ បានដឹងទាន់ក៏បានស្រវ៉ាចាប់ទាញជើងរបស់គាត់ ហើយព្យាយាមជួយសង្គ្រោះគាត់ពីគ្រោះថ្នាក់ដ៏រន្ធត់នេះ។ ក្រោយពីបានឃើញបែបនេះ អ្នកផ្សេងទៀតនៅជុំវិញទីនោះ ក៏នាំគ្នារត់មកជួយ ហើយទីបំផុត ពួកគេបានទាញបុរសដែលសន្លប់នោះ ឡើងមកខាងលើវិញដោយសុវត្ថិភាព។
យោងតាមសារព័ត៌មាន TNM បានអោយដឹងថា បុរសដែលបានដួលសន្លប់នោះមានឈ្មោះ Binu និងក៏ត្រូវបានគេស្គាល់ថា Babu។ ចំណែកបុរសដែលបានជួយសង្គ្រោះ ត្រូវបានគេស្គាល់មានឈ្មោះ Thayyil Mittal Baburaj អាយុ ៤៥ ឆ្នាំ។
ការដួលធ្លាក់នេះអាចបណ្តាលឱ្យមានគ្រោះថ្នាក់ដល់ Babu ពីព្រោះមានខ្សែភ្លើងខ្វាត់ខ្វែងនៅក្រោមអាគារ។ Babu និង Baburaj ត្រូវបានដឹងថា គឺជាបុគ្គលិកនៃសាខា Kerala Bank នៅ Vadakara ។ អ្នកទាំងពីរកំពុងរង់ចាំវេនរបស់ពួកគេ ដើម្បីបង់មូលនិធិ Provident Fund របស់ពួកគេនៅពេលដែល Babu បានដួលសន្លប់។
អ្នកនិយមលេងអ៊ីនធឺណិតភាគច្រើនបានកោតសរសើរជាខ្លាំង ចំពោះភាពរហ័សរហួនរបស់លោក Baburaj ។ ក្នុងនោះ អ្នកលេងអ៊ីនធឺណេតម្នាក់ បាននិយាយថា “បុរសនេះពិតជាលឿនណាស់ ក្នុងការចាប់ជើងជនរងគ្រោះ” ។ រីឯអ្នកផ្សេងទៀតបានអត្ថាធិប្បាយថា៖ “ខ្ញុំសូមកោតសរសើរចំពោះភាពរហ័សរហួនរបស់គាត់ជាខ្លាំង”៕ រក្សាសិទ្ធិដោយ៖ លឹម ហុង
