ភ្នំពេញ÷បុរសម្នាក់បានយកកៅអីមកដាក់អង្គុយលេងនៅជាប់ជណ្តើរឡើងជាន់ទី៣ស្រាប់តែត្រូវប្លង់សេបាក់ធ្លាក់សង្កត់លើចំចង្កេះស្របពេលស្ត្រីជាជនរងគ្រោះម្នាក់ទៀតត្រូវជាម្តាយបង្កើតបានចេញមកជួយក៏ធ្លាក់មួយផ្ទាំងទៀតចំក្បាលបណ្តាលឲ្យរងរបួសធ្ងន់ទាំងម្តាយនិងកូន។
ហេតុការណ៍ភ្ញាក់ផ្អើលនេះដែរកើតឡើងនៅវេលាម៉ោង ០០ និង១៥ នាទីយប់ឈានចូលថ្ងៃសៅរិ៍ទី២៧ ខែមីនា ឆ្នាំ២០២១ ចំណុចក្រោយប៉ុស្តិ៍ ផ្សារចាស់ ស្ថិតនៅតាមបណ្តោយផ្លូវ១៧ សង្កាត់ផ្សាចាស់ ខណ្ឌដូនពេញ រាជធានីភ្នំពេញ។
ប្រភពព័ត៌មានពីលោកពូម្នាក់នៅកន្លែងកើតហេតុបានរៀបរាប់ឲ្យដឹងថា មុនពេលកើតហេតុខាងលើបុរសត្រូវជាជនរងគ្រោះបានយកកៅអីមកដាក់អង្គុយលេងនៅជាប់ជណ្តើរឡើងនៅជាន់ទី៣និយាយគ្នាលេងខណៈពេលដែលកំពុងតែអង្គុយនិយាយគ្នាស្រាប់តែបាក់ប្លង់សេពីខាងលើជាន់ទី៤ មួយផ្ទាំងបានសង្កត់ទៅលើគាត់ចំចង្កេះជាប់ក៏បានស្រែកឲ្យគេជួយស្របពេលស្ត្រីរងគ្រោះម្នាក់ទៀតត្រូវជាម្តាយបង្កើតបានចេញមកជួយស្រាប់តែបាក់មួយផ្ទាំងទៀតមកលើក្បាលរបស់ស្ត្រីរងគ្រោះត្រូវជាម្តាយបង្កើតបណ្តាលឲ្យរងរបួសធ្ងន់ទាំងម្តាយនិងកូនត្រូវបានរថយន្តសាម៉ុយដឹកយកទៅមន្ទីរពេទ្យកាល់ម៉ែត ដើម្បីសង្គ្រោះបន្ទាន់ផងដែរ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់រួចធ្វើការសាកសួរជំុវិញកន្លែងកើតហេតុដើម្បីងាយស្រួលឲ្យខាងសង្កាត់ចុះទៅត្រួតពិនិត្យទីតាំងកន្លែងដែលកើតហេតុបន្ត៕
រក្សាសិទ្ធិដោយ៖ សា មេត
