ភ្នំពេញ ៖ ជនសង្ស័យចំនួន២ ក្នុងចំណោមបក្ខពួក៤ នាក់ត្រូវបានសមត្ថកិច្ចឡោមព័ទ្ធចាប់បានជាបន្តបន្ទាប់ និងពីរនាក់ទៀតកំពុងរត់គេចខ្លួន ក្រោយពីបានជិះម៉ូតូចំនួន២ គ្រឿងបានធ្វើសកម្មភាពឆក់ទូរស័ព្ទដៃពីបុរសម្នាក់បានសម្រេច នៅចំណុចផ្លូវលេខ១៨៦ កែងនឹងផ្លូវ២៦៥ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញកាលពីវេលាម៉ោង៨ និង២០ នាទីយប់ថ្ងៃទី ២៦ ខែមីនាឆ្នាំ ២០២១។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុឃើញបុរសម្នាក់ឈរកាន់ទូរស័ព្ទដៃម៉ាក samsung មួយគ្រឿងនៅតាមបណ្ដោយផ្លូវ ១៨៦ កែងនឹង ២៦៥ ខណៈនោះក៏មានជនសង្ស័យចំនួន៤នាក់ជិះម៉ូតូចំនួនពីរគ្រឿង ម៉ាកឌ្រីមសង់មួយគ្រឿងនិងម៉ាកហុងដាប៊ីតមួយគ្រឿងទៀត បានធ្វើសកម្មភាពឆក់ទូរស័ព្ទដៃពីជនរងគ្រោះ បានសម្រេច រួចក៏នាំគ្នាជិះម៉ូតូគេចខ្លួនតាមបណ្ដោយផ្លូវ១៨៦ទៅទិសខាងលិច ខណៈជិះចេញបានប្រមាណជាង ១០០ម៉ែត្រក៏ដល់ផ្លូវទាល់ ធ្វើឲ្យជនសង្ស័យផ្តួលម៉ូតូចោល រួចនាំគ្នារត់យករួចខ្លួនឡើងលើផ្ទះប្រជាពលរដ្ឋ ខណៈនោះ ប្រជាពលរដ្ឋនិងសមត្ថកិច្ចនាំគ្នាឡោមព័ទ្ធចាប់បានជនសង្ស័យចំនួន២នាក់ជាបន្តបន្ទាប់ ចំណែកបក្ខពួក២ នាក់ទៀតសមត្ថកិច្ចកំពុងតាមចាប់ខ្លួនបន្ត ។
បច្ចុប្បន្នជនសង្ស័យទាំង២ នាក់រួមទាំងម៉ូតូចំនួន ២គ្រឿងត្រូវបានកម្លាំងសមត្ថកិច្ចបញ្ជូនមកអធិការដ្ឋាននគរបាលខណ្ឌទួលគោកដើម្បីធ្វើការសួរនាំនិងធ្វើកំណត់ហេតុដើម្បីបញ្ជូនទៅតុលាការចាត់ការទៅតាមនីតិវិធីច្បាប់៕
រក្សាសិទ្ធិដោយ ៖មីដា
