ម៉ានីល៖ រដ្ឋមន្ត្រីក្រសួងការពារជាតិហ្វីលីពីន បាននិយាយថា យោធាហ្វីលីពីនកំពុងបញ្ជូនយន្តហោះចម្បាំងធុនស្រាលដើម្បីហោះពីលើនាវាចិនរាប់រយគ្រឿងនៅក្នុងដែនទឹកដែលមានជម្លោះនៅក្នុងសមុទ្រចិនខាងត្បូង ខណៈដែលលោកបានបញ្ជាក់ពីការទាមទារម្តងទៀតឱ្យនាវាទាំងអស់ចាកចេញពីតំបន់ជម្លោះភ្លាមៗ។
ការព្រួយបារម្ភរបស់អន្តរជាតិកំពុងកើនឡើង នូវអ្វីដែលប្រទេសហ្វីលីពីនបានពិព័រណ៌ថា នាវារបស់ចិនប្រមាណជា២០០គ្រឿង កំពុងបង្ហាញពីការលុកលុយ និងគំរាមគំហែងមកលើខ្លួន ដោយទីក្រុងម៉ានីលជឿជាក់ថានេះជាការគ្រប់គ្រងរបស់កងកម្លាំងទ័ពសមុទ្ររបស់ចិន។
នាវាទាំងអស់នោះបានធ្វើដំណើរចូលចតក្នុងតំបន់ថ្មប៉ប្រះទឹក Whitsun Reef ដែលមានចម្ងាយពីតំបន់សេដ្ឋកិច្ចផ្តាច់មុខរបស់ទីក្រុងម៉ានីលប្រមាណជា២០០ម៉ាយ។
រដ្ឋលេខាធិកាក្រសួងការពារជាតិ លោក Delfin Lorenzana បាននិយាយក្នុងសេចក្តីថ្លែងការណ៍កាលពីល្ងាចថ្ងៃសៅរ៍ ទី២៨នេះថា យន្តហោះចម្បាំងរបស់ប្រទេសហ្វីលីពីន បានបញ្ចូលទៅកាន់តំបន់ថ្មប៉ប្រះទឹក Whitsun Reef ជារៀងរាលថ្ងៃដើម្បីតាមដានពីស្ថានការណ៍នៅទីនោះ។ លោក Lorenzana ក៏បាននិយាយថា យោធាហ្វីលីពីន នឹងបង្កើនវត្តមានកងទ័ពជើងទឹកក្នុងសមុទ្រចិនខាងត្បូងដើម្បីល្បាតក្នុងដែនអធិបតេយ្យភាព និងជាការការពារអ្នកនេសាទរបស់ខ្លួនផងដែរ។
លោក Lorenzana ថ្លែងថា៖ កងទ័ពជើងអាកាស និងជើងទឹករបស់យើងត្រៀមខ្លួនរួចជាស្រេចក្នុងការការពារដែនអធិបតេយ្យភាព និងសិទ្ធអធិបតេយ្យភាពរបស់យើងរួចរាល់ហើយ។ ស្ថានទូតចិនប្រចាំទីក្រុងម៉ានីល ប្រទេសហ្វីលីពីន មិនទាន់អាចសុំការអធិប្បាយបាននៅឡើយទេ។ ក៏ប៉ុន្តែស្ថានទូតបានបញ្ជាក់បែបនេះថា នាវាជើងទឹកនៅកោះ Whitsun Reef គ្រាន់តែជាទូកនេសាទត្រីដែលទឹកជនភៀសខ្លួនពីរលកសមុទ្រធំៗតែប៉ុណ្ណោះនៅលើទូកនោះមិនមានកងទ័ពណាម្នាក់នៅលើនោះទេ។
អ្នកនាំពាក្យរបស់លោក Rodrigo Duterte បាននិយាយកាលពីសប្តាហ៍មុនថា លោកប្រធានាធិបតីហ្វីលីពីន Rodrigo Duterte បានបញ្ជាក់សារជាថ្មីទៅកាន់ឯកអគ្គរដ្ឋទូតចិន លោក Huang Xilian ថា ប្រទេសហ្វីលីពីនបានឈ្នះក្តីលើករណីកំណត់សញ្ញាសំគាល់ព្រំដែនក្នុងឆ្នាំ២០១៦ ដែលនេះសរបញ្ជាក់ឱ្យកាន់តែច្បាស់ពីសិទ្ធអធិបតេយ្យភាពរបស់ខ្លួន ចំពេលដែលមានការទាមទាររបស់ចិនដែលជាគូប្រជែងខ្លាំង។
គូសបញ្ជាក់ថា ប្រទេសប្រ៊ុយណេ ម៉ាឡេស៊ី ហ្វីលីពីន តៃវ៉ាន់ ចិន និងវៀតណាម បានកំពុងប្រជែងគ្នាទាម ទារទឹកដីក្នុងសមុទ្រចិនខាងត្បូង ពីព្រោះទំហំពាណិជ្ជកម្មឆ្លងកាត់សមុទ្រចិនខាងត្បូងនេះប្រចាំឆ្នាំមានទឹកប្រាក់យ៉ាងហោចណាស់ចំនួន ៣,៤ ទ្រីលានដុល្លារ៕
ប្រភព៖ រ៉យទ័រ/ Reuter