ខេត្តរតនគិរី ៖ លោកវរសេនីយ៍ឯក សូយ សំណាង អធិការនគរបាលស្រុកអូយ៉ាដាវ បានឱ្យដឹងថា ប្រជាពលរដ្ឋចំនួន៧នាក់បានហូបត្រីខកំប៉ុង ក៏ស្រាប់តែពុល បណ្តាលឱ្យក្អួតចង្អោរ ទន់ដៃទន់ជើងគ្រប់គ្នា ត្រូវបានកម្លាំងអធិការដ្ឋាននគរបាលស្រុកអូរយ៉ាដាវ ចុះទៅជួយ ដោយដឹកជញ្ជូនយកទៅសង្គ្រោះបន្ទាន់ភ្លាមៗផងដែរ។
ហេតុការណ៍នោះបានកើតឡើងកាលពីវេលាម៉ោង៦និង៣០នាទីល្ងាច ថ្ងៃទី០១ ខែមេសា ឆ្នាំ២០២១ ត្រង់ចំណុចភូមិភិ ឃុំសេសាន្ត ស្រុកអូរយ៉ាដាវខេត្តរតនគិរី។
លោកវរសេនីយ៍ឯក សូយ សំណាង បានឱ្យដឹងថា ជនរងគ្រោះទាំង៧នាក់ខាងលើនោះមាន ៖ ទី១-ឈ្មោះ សល់ សី ភេទប្រុស អាយុ១៦ឆ្នាំ, ទី២-ឈ្មោះ សល់ ឡេស ភេទប្រុស អាយុ១៥ឆ្នាំ, ទី៣-ឈ្មោះ សេវ លីន ភេទស្រី អាយុ១៤ឆ្នាំ, ទី៤-ឈ្មោះ សល់ ញូន ភេទប្រុស អាយុ១៣ឆ្នាំ, ទី៥-ឈ្មោះ សល់ ដានី ភេទស្រី អាយុ១១ឆ្នាំ, ទី៦-ឈ្មោះ សល់ សេ ភេទប្រុស អាយុ១៣ឆ្នាំ និងទី៧-ឈ្មោះ សល់ ព្រំ ភេទប្រុសអាយុ១២ឆ្នាំ។ ជនរងគ្រោះទាំងអស់គ្នា រស់នៅក្នុងភូមិ-ឃុំកើតហេតុខាងលើជាមួយគ្នា។ ក្រោយពីលោកបានទទួលដំណឹងពីលោកមេភូមិភ្លាមៗថា មានករណីអ្នកហូបត្រីខពុលហើយមានអាការៈវិលមុខ ក្អួតចង្អោរ ទន់ដៃទន់ជើងនោះ លោកក៏បានដឹកនាំកម្លាំងចុះទៅជួយអន្ដរាគមន៍ភ្លាមៗផងដែរ។ លុះពេលទៅដល់ ក៏ឃើញជនរងគ្រោះត្រូវបានអ្នកភូមិនាំមកដល់ចំណុចកំពង់ចម្លងភូមិភិទៅហើយ រួចក៏ដឹកយកមកកាន់មណ្ឌលសុខភាពស្រុកអូយ៉ាដាវ ដើម្បីសង្គ្រោះបន្ទាន់តែម្តង។
លោកអធិការបានបន្តថា នៅវេលាម៉ោង ៦:៣០នាទី លោកបានទទួលទូស័ព្ទពីលោកមេភូមិភិ ថា មានករណីអ្នកហូបត្រីខពុល ដោយមានអាការៈវិលមុខ ក្អួត ទន់ដៃទន់ជើង។ ដោយស្នើឱ្យជួយអន្ដរាគមន៍ ជួយទៅទទួលជនរងគ្រោះយកមកកាន់មណ្ឌលសុខភាព អូរយ៉ាដាវ។
លោកថា រហូតដល់ព្រឹកថ្ងៃទី២ ខែមីនា ឆ្នាំ២០២១ លោកចាត់ឱ្យមន្ត្រីរបស់លោកទៅធ្វើកំណត់ហេតុ នឹងនាំយកសំបកកំប៉ុងត្រីខ ម៉ាក គឺហ្វខេន ទៅអធិការដ្ឋានដើម្បីពិនិត្យ។ ពួកគាត់ទាំង ៧នាក់ បានធូរស្រាលខ្លះហើយ ប៉ុន្ដែគ្រូពេទ្យមិនទាន់អនុញ្ញាតឱ្យវិលត្រឡប់ទៅផ្ទះវិញនៅឡើយទេ ដោយរងចាំតាមដានអាការៈបន្តទៀត៕
រក្សាសិទ្ធិដោយ៖បញ្ញាស័ក្តិ
