ភ្នំពេញ÷បុរសម្នាក់ជិះម៉ូតូលឿនពេកដល់ផ្លូវបំបែកជា៤ បានជ្រុលចង្កូតទៅបុករថយន្តព្រូសកំពុងតែបើកឆ្លងផ្លូវចំពាក់កណ្តាលទ្វារខាងស្តាំពេញទំហឹងបណ្តាលឲ្យម្ចាស់ម៉ូតូរងរបួសធ្ងន់បញ្ជូនទៅមន្ទីរពេទ្យ។
ហេតុការណ៍គ្រោះថ្នាក់ចរាចរណ៍នេះដែរបានកើតឡើងនៅវេលាម៉ោង ៧ និង៥០នាទីយប់ថ្ងៃអាទិត្យទី៤ ខែមេសា ឆ្នាំ២០២១ ស្ថិតនៅតាមបណ្តោយផ្លូវ៣១០ កែងផ្លូវ៥៧ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
បើយោងតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថានៅមុនពេលកើតហេតុគេបានឃើញរថយន្តម៉ាកtoyota priusមួយគ្រឿងពណ៌សពាក់ផ្លាកលេខកំពត 2-C 2232 បើកបរដោយបុរសម្នាក់ធ្វើដំណើរតាមបណ្តោយផ្លូវ៣១០ ក្នុងទិសដៅពីជើងមកត្បូងក្នុងល្បឿនមធ្យម ខណៈមកដល់ចំណុចកើតហេតុផ្លូវបំបែកជា៤ ស្រាប់តែមានយុវជនម្នាក់ជិះម៉ូតូម៉ាក zomrex មួយគ្រឿងពណ៌ខ្មៅពាក់ផ្លាកលេខ ភ្នំពេញ1-HT 7395 ធ្វើដំណើរតាមបណ្តាយ៥៧ ក្នុងទិសដៅពីកើតមកលិចក្នុងល្បឿនលឿនមកបុកចំពាក់កណ្តាលទ្វារខាងស្រាំរថយន្ត toyota priusពេញទំហឹងបណ្តាលឲ្យម៉ូតូដួល និងរងរបួសធ្ងន់បុរសជាម្ចាស់ម៉ូតបញ្ជូនយកទៅសង្គ្រោះភ្លាមៗផងដែរ។
ក្រោយពេលកើតហេតុសមត្ថកិច្ចមូលដ្ឋានសហការជាមួយនឹងខាងជំនាញចរាចរណ៍ខណ្ឌបឹងកេងកងចុះមកដល់រួចក៏បានទំនាក់ទំនងទៅខាងជំនាញក្រុងឲ្យចុះមកវាស់វែងនិងធ្វើកំណត់ហេតុយកម៉ូតូនិងរថយន្តទៅរក្សាទុកនៅខាងការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញរង់ចាំដោះស្រាយនៅពេលក្រោយ៕
រក្សាសិទ្ធិដោយ៖ សា មេត
