តាកែវ ៖ ក្មេងស្រីមានជំងឺពងបែករបកសាច់ពេញខ្លួន ប្រចាំកាយ ដែលជួបគ្រោះអកុសល្យត្រូវភ្លើងឆេះផ្ទះខ្ទេចគ្មានសល់ ស្ថិតក្នុងភូមិត្រពាំងក្រទ្បាញ់ ឃុំអូរសារាយ៍ ស្រុកត្រាំកក់ ខេត្តតាកែវ ត្រូវបានចលនាយុវជនកម្ពុជាក្រុម ១៥៧ សាខាខេត្តតាកែវ ធ្វើផ្ទះឡើងវិញឲ្យ មួយខ្នង និងផ្តល់អំណោយជាគ្រឿងឧបភោគបរិភោគជូនដល់ក្រុមគ្រួសារក្រីក្ររបស់កុមារីមានជំងឺ ប្រចាំកាយដែលគួរអាណិតនោះ កាលពីរសៀលថ្ងៃទី ០៥ ខែមេសា ឆ្នាំ២០២១ ។
ថ្លៃងទៅកាន់ក្រុមគ្រួសារកុមារីរងគ្រោះខាងលើ លោក កែវ វ៉ាន្នី ប្រធានចលនាយុវជនកម្ពុជាក្រុម ១៥៧ សាខាខេត្តតាកែវ បានលើកឡើងថា ក្រោយឃើញមានការផ្សព្វផ្សាយតាមបណ្តាញសង្គម បង្ហាញពីរូបភាពនៃអការៈជំងឺ ដែលមាននៅលើរូបរាងកាយរបស់កុមារី រួន មាលី អាយុ ១២ឆ្នាំ មានសភាពពងបែក និងរបកសុះសាច់អស់ពេញខ្លួនប្រាណនោះ រូបលោករួមជាមួយលោក អេង ប៉ជាក ជាអនុប្រធាន និងទទួលបានការណែនាំផ្ទាល់ពីសំណាកឯកឧត្តម ម៉ឹង ពន្លក ប្រធានចលនាយុវជនកម្ពុជាក្រុម១៥៧ បានឲ្យ ក្រុមការងារចុះមកសិក្សាពីស្ថានភាពកុមារីរងគ្រោះ ដោយបានសម្រេចសាងសង់ផ្ទះឲ្យមួយខ្នង និងផ្តល់ជាសម្ភារប្រើប្រាស់ក្នុងផ្ទះ គ្រឿងឧបភោគបរិភោគ មួយចំនួន ជូនដល់ក្រុមគ្រួសារកុមារីមានជំងឺនោះ ។
លោក កែវ វ៉ាន្នី បានបញ្ជាក់ថា បន្ទាប់ពីស្ថានភាពនៃការឆ្លងរីករាលដាលនៃជំងឺ កូវីដ១៩ មានការថមថយចុះ លោកប្រធានចលនាយុវជនកម្ពុជាក្រុម១៥៧ និងយកកុមារីដែលមានជំងឺពងបែករបកសាច់សុះខ្លួននេះ ទៅធ្វើការព្យាបាលនៅមន្ទីរពេទ្យនៅរាជធានីភ្នំពេញ ។
ជាមួយគ្នានេះដែរលោកប្រធានចលនាយុវជនកម្ពុជា ក្រុម ១៥៧ សាខាខេត្តតាកែវ ក៏បានធ្វើការណែនាំពីវិធាន ការរបស់ក្រសួងសុខាភិបាល ដើម្បីឲ្យពួកគាត់បាន យល់ដឹងកាន់ច្បាស់ អំពីវិធីសាស្ត្រក្នុងការការពារខ្លួន ឲ្យជៀសផុតពីជំងឺឆ្លង ដ៏កាចសាហាវ កូវីដ១៩មួយនេះ ព្រមទាំងធ្វើការផ្សព្វផ្សាយពីប្រសាសន៍ ណែនាំដ៏ខ្ពង់ខ្ពស់ របស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នូវវិធានការពារ ៣កុំ ៣ការពារ ដោយសូមឲ្យបងប្អូនប្រជាពលរដ្ឋទាំងអស់ត្រូវចូលរួមអនុវត្តឲ្យបានគ្រប់ៗគ្នា៕
រក្សាសិទ្ធិដោយ៖ តាកែវ