ភ្នំពេញ ៖ លោក ម៉េត មាសភក្ដី អ្នកនាំពាក្យសាលារាជធានីភ្នំពេញ បានចេញមកបញ្ជាក់ប្រាប់ថា ការប្រញាប់ប្រញាប់ប្រញាល់ចុះទៅបិទផ្ទះមួយចំនួននៅភូមិ ១៦ សង្កាត់ទន្លេបាសាក់ ដោយសារតែប្រជាពលរដ្ឋរស់នៅក្នុងក្រុមទី១៦ នោះមានអ្នកឆ្លងកូវីដ-១៩ ចំនួន ៩ នាក់ ។
ហេតុនេះដេីម្បីទប់ស្កាត់កុំអោយឆ្លងរីករាលដាលកាន់តែច្រេីន ទេីបក្រុមការងារមានគ្រូពេទ្យ មន្ត្រីអាជ្ញាធរ មន្ត្រីនគរបាល ចុះទៅបិទភ្លាមៗដោយមិនអនុញ្ញាតិអោយបងប្អូនប្រជាពលរដ្ឋដែលរស់នៅក្នុងក្រុមទី ១៦ ចាកចេញពីផ្ទះទេ គឺត្រូវធ្វើចត្តាឡីស័កនៅនឹងកន្លែងតែម្ដង ។
ប៉ុន្តែចំណាត់ការរបស់ក្រុមការងារ បានធ្វើឲ្យប្រជាពលរដ្ឋម្នាក់ពីរនាក់ ប្រឆាំងនឹងការបិទភ្លាមៗនេះដោយពួកគាត់អះអាងថាមិនទាន់បានត្រៀមស្បៀងម្ហូបម្ហានៅឡេីយ ។ ចំណែកមន្ត្រីក្រុមការងារបានពន្យល់ប្រាប់អំពី មូលហេតុដែលបិទភ្លាមៗនេះគឺដោយសារតែនៅទីនេះមានប្រជាពលរដ្ឋ ៩ នាក់ហេីយបានតេស្ដទៅមានវិជ្ជមានកូវីដ-១៩ ។ បេីអនុញ្ញាតឲ្យប្រជាពលរដ្ឋនៅក្រុមទី១៦ ចេញទៅផ្សារអាចបង្កហានិភ័យខ្ពស់ ព្រោះថាមិនដឹងអ្នកណាខ្លះដែលបានឆ្លងពីប្រជាពលរដ្ឋទាំង ៩ នាក់នោះ ។
ទោះជាមន្ត្រីក្រុមការងារពន្យល់ប្រាប់យ៉ាងណាក៏ដោយក៏មានស្រីម្នាក់ចេញមក live video តវ៉ាប្រឆាំងនឹងវិធានការសុខាភិបាល រហូតធ្វើឲ្យមន្ត្រីនគរបាលដែលចុះទៅគំរាមវ៉ៃខ្នោះផងដែរ ។
នៅយប់ថ្ងៃទី ៥ ខែ មេសា ឆ្នាំ ២០២១ លោក ឃួង ស្រេង អភិបាលរាជធានីភ្នំពេញ បានចុះទៅចែកអំណោយមួយចំនួនដល់បងប្អូនប្រជាពលរដ្ឋដែលកំពុងធ្វើចត្តាឡីស័កនៅ ភូមិ ១៦ សង្កាត់ ទន្លេបាសាក់ ខណ្ឌចំការមន ។
ចំពោះវីដេអូរបស់ស្រីម្នាក់នេះ ត្រូវបានពួកបំពុលសង្គមយកទៅចែកចាយផ្សាយវាយប្រហារមន្ត្រីក្រុមការងារយ៉ាងគឃ្លេីនបំផុត ។ ការលះបង់របស់មន្ត្រីក្រុមការងារមិនមែនដើម្បីក្រុមគ្រួសារពួកគាត់ទេ ប៉ុន្តែដើម្បីប្រជាពលរដ្ឋ និង សង្គមជាតិទាំងមូល ។ ដូច្នេះសូមបងប្អូនប្រជាពលរដ្ឋដែលមិនទាន់យល់ និង មានគំនិតអស្មេរមានៈនោះ មេត្តាភ្ញាក់រលឹកឡេីងកុំមានគំនិតដូចមនុស្សស្រីម្នាក់នេះអោយសោះ ។
អភិបាលរាជធានីភ្នំពេញ រំពឹងថា ព្រឹត្តិការណ៍សហគមន៍ ២០កុម្ភៈ អាចបញ្ចប់នៅក្រោយថ្ងៃចូលឆ្នាំខ្មែរ។ ការលើកឡើងរបស់អភិបាលរាជធានីភ្នំពេញ ក្នុងខណៈដែលលោកបានដឹកនាំមន្ត្រី និងអាជ្ញាធរខណ្ឌចំការមន ចុះពិនិត្យមើលស្ថានភាពរស់នៅរបស់ប្រជាពលរដ្ឋ និងបាននាំយកនូវស្បៀងអាហារមួយចំនួន ដើម្បីយកទៅផ្គត់ផ្គង់ជូនពួកគាត់ដែលកំពុងធ្វើចត្តាឡីស័កនៅភូមិ១៦ ក្នុងសង្កាត់ទន្លេបាសាក់ ខណ្ឌចំការមន ខណៈ ដែលពួកគាត់ជួបការលំបាកក្នុងជីវភាព ពេលកំពុងធ្វើចត្តាឡីស័ក ក្រោយពីពួកគាត់មួយចំនួនបានប៉ះពាល់ជាមួយនឹងអ្នកដែលមានវិជ្ជមានកូវីដ-១៩។
ឯកឧត្តម ឃួង ស្រេង អភិបាលរាជធានីភ្នំពេញ បានឱ្យដឹងថាការអនុវត្តនូវវិធានការរដ្ឋបាលជាបណ្ដោះអាសន្ន ក្នុងរយៈពេលប៉ុន្មានថ្ងៃមកនេះ ពោលគឺចាប់ផ្ដើមពីថ្ងៃទី១ ខែមេសា ឆ្នាំ២០២១ ប្រជាពលរដ្ឋប្រមាណ ៩៩ភាគរយ បានចូលរួមជាមួយរដ្ឋបាលរាជធានីភ្នំពេញ ក្នុងការបង្ការ និងទប់ស្កាត់ជំងឺកូវីដ-១៩។
អភិបាលរាជធានីភ្នំពេញ បានលើកឡើងថា បើប្រជាពលរដ្ឋមានការចូលរួមសហការយ៉ាងសស្រាក់សស្រាំបែបនេះ ការបង្ការ និងទប់ស្កាត់ជំងឺ-១៩ ក្នុងព្រឹត្តិការណ៍២០កុម្ភៈ អាចបញ្ចប់នៅក្រោយពិធីបុណ្យចូលឆ្នាំប្រពៃណីជាតិខ្មែរនេះបានហើយ។ ដូចនេះ ប្រជាពលរដ្ឋទាំងអស់ត្រូវចូលរួមទាំងអស់គ្នាការពារខ្លួន តាមការណែនាំរបស់រាជរដ្ឋាភិបាលគឺ វិធានការ ៣ការពារ និង ៣កុំ។
អំណោយដែលប្រជាពលរដ្ឋ ទទួលបាននៅពេលនេះ ជាអំណោយរបស់សម្ដេចតេជោ ហ៊ុន សែននាយករដ្ឋមន្ត្រី និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្នុងមួយគ្រួសារទទួលបានអង្ករ២៥ គីឡូក្រាម និងមីមួយកេស។
បើយោងតាមមន្ត្រីរដ្ឋបាលខណ្ឌចំការមន ប្រជាពលរដ្ឋរស់នៅក្នុងភូមិទី១៦ ក្នុងសង្កាត់ទន្លេបាសាក់ មានចំនួនជាង ៣០០គ្រួសារ ប៉ុន្តែប្រជាពលរដ្ឋ ដែលអាជ្ញាធរតម្រូវឱ្យពួកគាត់ធ្វើចត្តាឡីស័កនោះ មានចំនួនតែជាង១៦០គ្រួសារប៉ុណ្ណោះ។ ដោយមានការយកចិត្តទុកដាក់ពី អភិបាលរាជធានីភ្នំពេញ និងទៅតាមណែនាំរបស់សម្ដេចតេជោ ហ៊ុន សែន ទើបមានការដឹកនាំអាជ្ញាធរ ចុះដល់ទីតាំងដើម្បីសាកសួរ ពិនិត្យស្ថានភាពជាក់ស្តែង និងផ្តល់ ស្បៀងអាហារជូនពួកគាត់ ខណៈដែលប្រជាពលរដ្ឋទាំងនេះមានជីវភាពខ្វះខាត៕ រក្សាសិទ្ធិដោយ៖បញ្ញាស័ក្តិ
