យ៉ាងណាស់ នៅចុងឆ្នាំ២០២១ ស្របពេលដែលការគ្រប់គ្រងកូវីដ-១៩ នៅសហគមន៍ ខេត្តសៀមរាប-អង្គរ មានភាពល្អប្រសើរ ព្រមជាមួយនឹងការជំរុញចាក់វ៉ាក់សាំងបានលឿន ជូនចំពោះមន្ត្រីរាជការ អ្នកបម្រើការក្នុងឧស្សាហកម្មទេសចរណ៍ និងផ្នែកឯកជនក្នុងវិស័យផ្សេងទៀត, កម្ពុជា នឹងពិចារណាបើកទទួលភ្ញៀវទេសចរអន្តរជាតិ ដែលបានចាក់វ៉ាក់សាំងបង្ការជំងឺកូវីដ-១៩រួចរាល់។ នេះជាការស្នើសុំរបស់ លោក ថោង ខុន រដ្ឋមន្ត្រីក្រសួងទេសចរណ៍ ទៅកាន់ប្រមុខរាជរដ្ឋាភិបាល ហើយថា សម្ដេចតេជោតេជោ ហ៊ុនសែន បានពិចារណាយល់ព្រម។
រដ្ឋមន្ត្រីក្រសួងទេសចរណ៍រូបនេះ បានប្រាប់អ្នកសារព័ត៌មាន ឲ្យដឹងនៅថ្ងៃទី០៧ ខែមេសា ឆ្នាំ២០២១ ថា សម្តេចតេជោ ហ៊ុន សែន បានអនុញ្ញតឱ្យក្រសួងទេសចរណ៍ចាប់ផ្តើមធ្វើការពិភាក្សាជាមួយក្រសួងសុខាភិបាល (គណៈកម្មការចំពោះកិច្ច) ក្រសួង-ស្ថាប័នពាក់ពាន់ រដ្ឋបាលខេត្ត និងវិស័យឯកជន ដើម្បីសិក្សាអំពីការបើកទទួលកញ្ចប់ទស្សនកិច្ច ចំពោះទេសចរដែលចាក់វ៉ាកក់សាំងរួចហើយ នៅត្រីមាសទី៤ នៃឆ្នាំ២០២១ ឬពេលវេលាសមស្របណាមួយដ៏ឆាប់ខាងមុខនេះ។
វាដើរស្របគ្នា នៃផែនទីចង្អុលផ្លូវសម្រាប់ស្តារវិស័យទេសចរណ៍កម្ពុជាឡើងវិញ ក្នុង និងក្រោយវិបត្តិកូវីដ១៩» ដែលរាជរដ្ឋាភិបាលទើបបានអនុម័តថ្មីៗនេះ , លោករដ្ឋមន្ត្រី ថោង ខុន បានបង្ហាញថា កញ្ចប់ទស្សនិច្ចនេះ អាចមានការងារច្រើន ដែលត្រូវពិភាក្សាដោយហ្មត់ចត់ រួមមាន ៖
១- ការបង្កើតនូវជំនឿជឿជាក់ទុកចិត្តដល់ភ្ញៀវទេសចរ,
២- គុណភាព សេវាកម្ម និងតម្លៃសមរម្យ,
៣- សម្រួលការធ្វើដំណើរ តាមច្រកទ្វារអន្តរជាតិ ដែលត្រូវគោរពតាមគោលការណ៍សុខាភិបាលផង និងភាពងាយស្រួលផង៕
រក្សាសិទ្ធិ : ពិសិដ្ឋ CEN
