តាកែវ ៖ អភិបាលខេត្តតាកែវ ឯកឧត្តម អ៊ូច ភា បានធ្វើការណែនាំទៅដល់អភិបាលក្រុងស្រុកទាំង១០ ត្រូវចុះត្រួតពិនិត្យទីតាំងភូមិសាស្ត្រដែលខ្លួនគ្រប់គ្រងឲ្យបានម៉ត់ចត់ និងណែនាំទៅដល់ម្ចាស់ទីតាំង ទេសចរណ៍ទាំងអស់ ជាពិសេសផ្លូវនៅជាប់គោលដៅព្រំប្រទល់ខេត្តតាកែវជាមួយនិង កំពត កំពង់ស្ពឺ និងខេត្តកណ្តាល ត្រូវតែចូលរួមអនុវត្តសេចក្តីសម្រេចរបស់រាជរដ្ឋាភិបាល ស្តីពីការហាមឃាត់ការធ្វើដំណើរនិងការបិទរមណីយដ្ឋានទេសចរណ៍ ទូទាំងប្រទេសជាបណ្តោះអាសន្ន ដើម្បីទប់ស្កាត់ការឆ្លងរីករាលដាលជំងឺកូវីដ១៩ ។
ឯកឧត្តម អ៊ូច ភា អភិបាលខេត្តតាកែវលើកឡើងបែបនេះ នៅក្នុងអង្គប្រជុំក្នុងជួរគណៈអភិបាលស្រុកនិងក្រុង កាលពីថ្ងៃទី ០៧ ខែមេសា ឆ្នាំ២០២១ ក្រោយមានការចេញសេចក្តីសម្រេចរបស់រាជរដ្ឋាភិបាល ស្តីពីការហាមឃាត់ការធ្វើដំណើរ និងការបិទរមណីដ្ឋានទេសចរណ៍ទូទាំងប្រទេសជាបណ្តោះអាសន្ន ដើម្បីចូលរួមទប់ស្កាត់ការឆ្លងរីករាលដាលជំងឺកូវីដ១៩ ទៅដល់សហគមន៍កាន់តែធ្ងន់ធ្ងរជាងនេះថែមទៀត ដូច្នោះសូមលោកអភិបាលក្រុងស្រុក និងកម្លាំងសមត្ថកិច្ចទាំងអស់ ពិសេសបណ្តាស្រុកដែលជាប់ខេត្តកំពត កំពង់ស្ពឺ និងខេត្តកណ្តាល ត្រូវយកចិត្តទុកដាក់ឲ្យបានខ្ពស់ ពង្រឹងតាមគោលដៅដែលមានស្រាប់ធ្វើយ៉ាងណា គឺរាំងខ្ទប់ការធ្វើដំណើរឆ្លងខេត្តពីសំណាក់បងប្អូនប្រជាពលរដ្ឋ ក្នុងរយៈពេល១៤ថ្ងៃនេះ អោយបានតឹងរ៉ឹងបំផុត។
ឯកឧត្តមអភិបាលខេត្ត បន្ថែមទៀតថា ទន្ទឹមនឹងការចុះត្រួតពិនិត្យ និងពង្រឹងក៏ដូចជាការហាមឃាត់ការធ្វើដំណើរឆ្លងកាត់ខេត្តនេះ អាជ្ញាធរមូលដ្ឋាន និងអ្នកពាក់ព័ន្ធទាំងអស់ ត្រូវតែយកចិត្តទុកដាក់ ផងដែរ ចំពោះបងប្អូនប្រជាពលរដ្ឋនៅក្នុងមូលដ្ឋានដែលរៀបចំកម្មវិធីជួបជុំបងប្អូន ដែលមានលក្ខណៈអ៊ូរអរ និងមានមនុស្សច្រើន ត្រូវតែណែនាំពួកគាត់អោយអនុវត្តនូវវិធានការណ៍៣កុំ និង៣ការពារអោយបានខ្លាំងខ្លាបំផុត ពោលគឺជៀសវាងដាច់ខាតនូវការជួបជុំដែលមានមនុស្សច្រើន និងអ៊ូរអរ នៅក្នុងពិធីបុណ្យចូលឆ្នាំប្រពៃណីជាតិខ្មែរខាងមុខនេះ ។
ជាមួយគ្នានេះដែរ ឯកឧត្តម អ៊ូច ភា ក៏បានណែនាំបន្ថែមទៀតទៅដល់អាជ្ញាធរមូលដ្ឋាន ត្រូវចុះផ្សព្វផ្សាយអំពីវិធានការណ៍របស់ក្រសួងសុខាភិបាល ក៏ដូចជាវិធានការណ៍៣កុំនិង៣ការពារ នៅតាមទីវត្តអារាមទាំងអស់ និងហាមមិនឱ្យរៀបចំកម្មវិធីកម្សាន្តសប្បាយនានាទាំងអស់ ។ ម្យ៉ាងទៀតអាជ្ញាធរមានសមត្ថកិច្ចក៏ត្រូវតែយកចិត្តទុកដាក់ផងដែរចំពោះសន្តិសុខសណ្តាប់ធ្នាប់ ដោយធានាភូមិឃុំមានសុត្ថិភាពជូនប្រជាពលរដ្ឋក្នុងបេសកកម្មប្រយុទ្ធប្រឆាំងជំងឺកូវីដ១៩ក្នុងមូលដ្ឋានខេត្តតាកែវនេះ ៕រក្សាសិទ្ធិដោយ៖ តាកែវ
