ភ្នំពេញ៖ បុរសម្នាក់បាត់មកដាក់ពាក្យបណ្តឹងឲ្យសមត្ថកិច្ចជួយអន្តរាគមន៍ក្រោយពេលចោរលួចម៉ូតូរបស់គាត់មួយគ្រឿងយកទៅបាត់ដោយសុវត្ថិភាព។
ជនរងគ្រោះខាងលើមានឈ្មោះ សូត សុខហោ ភេទប្រុស អាយុ៤០ មុខរបរកាត់ដេរ ស្នាក់នៅភូមិស្នែងរលើង សង្កាត់ទឹកថ្លា ខណ្ឌសែនសុខ។
បើតាមការរៀបរាប់ពីបុរសខាងលើបានឲ្យដឹងថានៅវេលាម៉ោង១២និង៣០នាទីរសៀលថ្ងៃទី៨ ខែមេសា ឆ្នាំ២០២១ រូបគាត់បានជិះម៉ូតូចេញពីបន្ទប់របស់គាត់យកលុយមកបង់បន្ទប់ជួលឲ្យម្ចាស់ផ្ទះជួលនៅម្តុំខាងក្រោយផ្សារដីហុយ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ខណ:ពេលដែលរូបគាត់ចាក់សោរម៉ូតូចតទុករួចយកលុយឲ្យម្ចាស់ផ្ទះជួលតែមួយពព្រិចភ្នែក ស្រាប់តែមានជនសង្ស័យ២នាក់ជិះម៉ូតូសេ១២៥មួយគ្រឿងពណ៍ខ្មៅពាក់ស្លាកលេខភ្នំពេញ 1IP 6277 បានមកធ្វើសកម្មភាពកាច់ ក ម៉ូតូរបស់គាត់មួយគ្រឿងម៉ាកស៊ុយស៊ុគីលែតពណ៍ស ពាក់ស្លាកលេខភ្នំពេញFI 2787យកទៅបាត់ ពេលនោះរូបគាត់បានដេញចាប់ជនសង្ស័យទាំង២នាក់ខាងលើដែរ តែជនសង្ស័យបានព្យាយាមជិះម៉ូតូរបស់គេចខ្លួនបាត់ស្រមោលដោយសុវត្ថិភាព។
ក្រោយពេលកើតហេតុម្ចាស់ម៉ូតូបានឲ្យកូនម្ចាស់ផ្ទះជួលដឹកមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ភ្នំពេញថ្មី ដើម្បីឲ្យសមត្ថកិច្ចជួយស្រាវជ្រាវស្វែងរកម៉ូតូឲ្យរូបគាត់វិញផងព្រោះម៉ូតូមួយគ្រឿងនេះគាត់ខំប្រឹងប្រែងសន្សុំលុយជាយូរខែឆ្នាំមកហើយទម្រាំនិងទិញវាបាន៕
ដោយ សួង សាម
