ភ្នំពេញ ៖ តុលាការបានសម្រេចដោះលែងខ្មាន់កាំភ្លើង ដែលជាមន្ដ្រីនគរបាលបាញ់ស្លាប់យុវជនបែកថ្នាំ ដើម្បីការពារខ្លួនពីការតាមដេញកាប់ កាលពីយប់ថ្ងៃទី០៦ ខែមេសា ឆ្នាំ២០២១នៅមុនធនាគារ អេប៊ីអេ (ABA) មហាវិថីសហព័ន្ធរុស្សី ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ (នៅជិតស្ពានអាកាសផ្សារដីហុយ) ដើម្បីការពារខ្លួន។ ការដោះលែងនេះ បានធ្វើឡើងនៅល្ងាចថ្ងៃទី៨ ខែមេសា ឆ្នាំ២០២១។
ខ្មាន់កាំភ្លើងឈ្មោះ ភឿន ភិរៈ ជាជាមន្ដ្រីនគរបាលនិងជាសន្តិសុខយាមធនាគារ អេប៊ីអេ (ABA) ត្រូវបានកម្លាំងនគរបាលបញ្ជូនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី០៨ ខែមេសា ឆ្នាំ២០២១។
ទាក់ទងការដោះលែងនេះ អ្នកនាំពាក្យ នៃអយ្យការអមសាលាដំបូងរាជធានីភ្នំពេញបានបញ្ជាក់ថាៈ នៅព្រឹកថ្ងៃទី០៨ ខែមេសា ឆ្នាំ២០២១ អយ្យការអមសាលាដំបូងរាជធានីភ្នំពេញ បាន ទទួលសំណុំរឿងពីមន្ត្រីនគរបាលយុត្តិធម៌ នៃស្នងការដ្ឋាននគរបាលរាជធានីភ្នំពេញ ពាក់ព័ន្ធនឹងឈ្មោះ ភឿង ភិរៈ បានបាញ់ទៅលើឈ្មោះ អ៊ូ សុផារ៉ាត់ បណ្តាលឲ្យស្លាប់នៅកន្លែងកើតហេតុ នៅចំណុចខាងមុខធនាគារ ABA មហាវិថីសហព័ន្ធរុស្សី ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានី ភ្នំពេញ កាលពីថ្ងៃទី០៦ ខែមេសា ឆ្នាំ២០២១។ ក្រោយពីបានសាកសួរលើឈ្មោះ ភឿង ភិរៈ និងបានពិនិត្យភស្តុតាងជាវីដេអូ និងឯកសារពាក់ព័ន្ធនានាក្នុងសំណុំរឿង ព្រះរាជអាជ្ញាបានដោះលែងឈ្មោះ ភឿង ភិរៈ ឲ្យមានសេរីភាព ហើយបន្តការស៊ើបអង្កេតលើករណីនេះជាបន្តទៀត។
សូមជម្រាបថា កាលពីយប់ថ្ងៃទី០៦ ខែមេសា ឆ្នាំ២០២១ មានករណីឃាតកម្មបាញ់សម្លាប់យុវជនបែកថ្នាំម្នាក់ ពីសំណាក់សន្តិសុខយាមធនាគារអេប៊ីអេ (ABA) ។ ការបាញ់នេះ គឺក្នុងសិទ្ធិស្វ័យការពារខ្លួន ខណៈពេលដែលយុវជនបែកកថ្នាំ បានកាន់កាំបិតដេញកាប់ទៅលើសន្តិសុខរូបនោះ បើទោះបីជាសន្តិសុខបានបាញ់គំរាមកុំឲ្យចូលជិតខ្លួនយ៉ាងណាក៏ដោយ តែដោយសារបែកថ្នាំជនរូបនោះ មិនខ្លាចញញើតនិងសម្លេងកាំភ្លើងដែលបាញ់គំរាមមកលើខ្លួននោះទេ គឺរិតតែដើរចូលសំដៅរកសន្តិសុខរូបនោះ និងដេញកាប់ រហូតសន្តិសុខបាញ់ត្រូវជនបែកថ្នាំបណ្តាលឲ្យស្លាប់៕ រក្សាសិទ្ធិដោយៈ ចេស្តារ
