ភ្នំពេញ÷ជនសង្ស័យមានគ្នា៤នាក់ជិះមូតូ២គ្រឿង បានធ្វើសកម្មភាពឆក់កាបូបពីស្ត្រីម្នាក់មិនបានសម្រេចបណ្តាលឲ្យស្ត្រីជាជនរងគ្រោះដួលម៉ូតូរងរបួសធ្ងន់ឈាមពេញខ្លួនត្រូវបានប្រជាពលរដ្ឋជួយហៅរថយន្តសង្គ្រោះបន្ទាន់ឲ្យមកយកទៅសង្គ្រោះភ្លាមៗចំណែកឯជនង្ស័យទាំង៤នាក់ជិះរត់គេចខ្លួនបាត់ស្រមោល។
ហេតុការណ៍ភ្ញាក់ផ្អើលនេះដែរកើតឡើងនៅវេលាម៉ោង៥ និង៣០នាទីព្រឹកថ្ងៃសុក្រទី៩ ខែមេសា ឆ្នាំ២០២១ ចំណុចគល់ស្ពានអាកាសស្ទឹងមានជ័យ ដែលស្ថិតនៅតាមបណ្តោយផ្លូវ ២៧១ ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។
ប្រភពព័ត៌មានពីស្ត្រីជាជនរងគ្រោះបានរៀបរាប់ឲ្យដឹងថានៅមុនពេលកើតហេតុខ្លួនបានជិះម៉ូតូមួយគ្រឿងម៉ាកហុងដាទ្រីមសង់សេ១២៥ ស៊េរី២០១៩ ពណ៌ខ្មៅពាក់ផ្លាកលេចខ កណ្តាល1-J 7437 ធ្វើដំណើរតាមបណ្តោយផ្លូវ២៧១ក្នុងទិសដៅពីត្បូងទៅជើង ចេញពីផ្ទះគោលបំណងទៅធ្វើការខណៈមកដល់ចំណុចកើតហេតុខាងលើគាត់បានឃើញជនសង្ស័យមានគ្នា៤នាក់ជិះម៉ូតូ២គ្រឿងមិនចាំម៉ាកបានតាមពីក្រោយរូបគាត់រួចក៏បានលូកដៃមកឆក់យកកាបូបតែមិនបានសម្រេចដោយកាបូបរបស់គាត់ចងជាប់នៅនឹងរានម៉ូតូ តែដោយរូបគាត់ទប់ចង្កូតម៉ូតូអត់ជាប់បណ្តាលឲ្យដួលរងរបួសហូរឈាមពេញមុខត្រូវបានប្រជាពលរដ្ឋជួយនិងហៅរថយន្តសាម៉ុយដឹកយកទៅសង្គ្រោះភ្លាមៗផងដែរ។
ក្រោយពេលកើតហេតុខាងលើដោយមិនមានសមត្ថកិច្ចមកដល់ក៏បានបងប្អូនប្រជាពលរដ្ឋយកម៉ូតូរបស់ស្ត្រីជនរងគ្រោះរក្សាទុកឲ្យសមត្ថកិច្ចសង្កាត់ទំនប់ទឹកមកយកទៅរក្សាទុករង់ចាំជនរងគ្រោះទៅដាក់ពាក្យបណ្តឹងដើម្បីងាយស្រួលសមត្ថកិច្ចតាមរកមុខសញ្ញាមកចាត់ការទៅតាមច្បាប់៕
រក្សាសិទ្ធិដោយ៖ សា មេត
