ភ្នំពេញ ៖ ការធ្វើដំណើរនៅតាមច្រកស្ពានព្រះមុនីវង្សថ្មី គឺត្រូវបានអនុញ្ញាត ដោយមិនអនុវត្តបម្រាមគោចរនោះទេ ចាប់ពីម៉ោង៨ យប់ ដល់ម៉ោង៥ភ្លឺ មូលហេតុដោយសារមានការកកស្ទះ ខណៈស្ពានកំពុងត្រូវជួសជុល។
លោកវរសេនីយ៍ឯក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ បានបញ្ជាក់ឲ្យដឹងថា ដោយសារតែមានការកកស្ទះចរាចរណ៍ ព្រោះតែស្ពានព្រះមុនីវង្សចាស់ កំពុងត្រូវបានជួសជុល ហេតុនេះ ការធ្វើដំណើរបស់បងប្អូនប្រជាពលរដ្ឋ ដែលចាកចេញពីកន្លែងធ្វើការ ឬប្រកបមុខរបរផ្សេងៗមានការយឺតយ៉ាវក្នុងចន្លោះម៉ោងបម្រាមគោចរនេះ គឺត្រូវបានអនុគ្រោះ។
លោកក៏បានឲ្យដឹងផងដែរថា ក្នុងនោះ មានខណ្ឌចំនួន២ត្រូវបានអនុគ្រោះ គឺខណ្ឌចំការមន និងខណ្ឌច្បារអំពៅ ដោយសារតែសមត្ថកិច្ចកំពុងជួយធ្វើការសម្រួលចរាចរណ៍នៅលើស្ពានព្រះមុនីវង្ស ដែលមានការកកស្ទះខ្លាំង។
ជាក់ស្តែង កាលពីព្រលប់ថ្ងៃទី៨ ខែមេសា ឆ្នាំ២០២១ យប់មិញនេះ គឺមានការកកស្ទះយ៉ាងខ្លាំងនៅចំណុចគោលដៅស្ពានអាកាសក្បាលថ្នល់ ដោយសារតែបងប្អូនប្រជាពលរដ្ឋ និងក៏ដូចមន្ត្រីរាជការ ម្នាក់ៗសុទ្ធតែប្រញាប់ប្រញាល់វិលត្រឡប់ទៅលំនៅដ្ឋានរបស់ខ្លួន ឲ្យបានមុនពេលម៉ោង ៨:០០នាទីយប់ ព្រោះខ្លាចសមត្ថកិច្ចចម្រុះដាក់គោលដៅបំរាមគោចរ ដែលសាលារាជធានីភ្នំពេញ ដាក់ឲ្យអនុវត្តទាំង១៤ខណ្ឌ ចាប់ពីម៉ោង ៨យប់ ដល់ម៉ោង៥ទៀបភ្លឺ៕ រក្សាសិទ្ធិដោយ៖ លឹម ហុង
