ភ្នំពេញៈ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានមានប្រសាសន៍ប្រាប់សារព័ត៍មាន CEN នៅមុននេះបន្តិចថា បើមិនមានអ្វីប្រែប្រួលទេ វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ (Sinovac) ចំនួន ៥សែនដូសបន្ថែមទៀតនឹងដឹកមកដល់ប្រទេសកម្ពុជានៅថ្ងៃទី១៧ ខែមេសា ឆ្នាំ២០២១ ខាងមុខនេះ។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍បញ្ជាក់នៅព្រឹកថ្ងៃទី១០ ខែមេសា នេះថា បច្ចុប្បន្នវ៉ាក់សាំងដែលបានមកដល់កម្ពុជាមានចំនួនជាង ២លានដូស (ស៊ីណូហ្វាម ១.៣លាន , ស៊ីណូវ៉ាក់ ១.៥លាន និង អាស្ត្រាសេនេកា ជាង៣០ម៉ឺនដូស)។ ដោយសម្តេចតេជោបានបញ្ជាក់ថា វ៉ាក់សាំងនឹងត្រូវបញ្ជូនមកដល់ជាបន្តបន្ទាប់ គឺនៅថ្ងៃទី១៧ ខែមេសា ឆ្នាំ២០២១ ចំនួន ៥សែនដូស , នៅខែឧសភា ឆ្នាំ២០២១ ចំនួន១លាន ៥សែនដូស , ខែមិថុនា ឆ្នាំ២០២១ ចំនួន៣លានដូស , ខែកក្កដា ឆ្នាំ២០២១ ចំនួន២លានដូសនិង ខែសីហា ឆ្នាំ២០២១ ចំនួន១លានដូស ។
សម្តេចនាយករដ្ឋមន្ត្រី ហ៊ុន សែន បានបញ្ជាក់ទៀតថា មកដល់ថ្ងៃនេះ កម្ពុជាបានចាក់វ៉ាក់សាំងកូវីដ-១៩ ជូនប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធបានជិត១លាននាក់រួចទៅហើយ ដោយក្នុងនោះ ចាក់វ៉ាក់សាំងជូនកងទ័ពបានចំនួន ២១៩.៨០៣នាក់ និង ផ្នែកស៊ីវិលចាក់វ៉ាក់សាំងបានចំនួនប្រមាណ ៦៧៨.០០០នាក់។
គួរបញ្ជាក់ថា រហូតមកដល់ពេលនេះ ប្រទេសចិនបានផ្តល់វ៉ាក់សាំងចំនួន ២.៨០០.០០០ (ពីរលានប្រាំបីសែន) ដូសដល់កម្ពុជាក្នុងនោះរួមមាន ១.៣០០.០០០ដូសជាអំណោយ និង ១.៥០០.០០០ដូស ជាការលក់មកឱ្យកម្ពុជាក្នុងតម្លៃពិសេស៕
រក្សាសិទ្ធិដោយ ៖ ចេស្តារ