សៀមរាប៖ សមត្ថកិច្ចបានខ្នះខ្នែងកំណត់មុខសញ្ញា និងរកស្វែងឃើញអ្នកពាក់ព័ន្ធជាមួយក្រុមគ្រួសារដែលវិជ្ជមានជំងឺ កូវី១៩រួចហើយនៅយប់ថ្ងៃទី១២ ខែមេសា ឆ្នាំ២០២១។
នៅយប់ថ្ងៃទី១២ ខែមេសា ឆ្នាំ២០២១ សមត្ថកិច្ចពាក់ព័ន្ធ បានខ្នះខ្នែងកំណត់មុខសញ្ញា និងរកស្វែងឃើញអ្នកពាក់ព័ន្ធជាមួយក្រុមគ្រួសារដែលវិជ្ជមានជំងឺកូវីដ១៩ របស់ លោក អ៉ឹង ខៃលី ដែលជាអាជីវករលក់ដូរនៅផ្សារក្រោម និងបន្ថែមមានទំនាក់ទំនងផ្សារវត្តអធ្វាផងដែរ។
រដ្ឋបាលខេត្ត សូមកោតសរសើរចំពោះសមត្ថកិច្ចគ្រប់ ផ្នែកទាំងក្រុមគ្រូពេទ្យ និងកងកម្លាំង ដែលយកចិត្តទុកដាក់ខ្ពស់ក្នុងការបំពេញភារកិច្ចចំពោះមុខ ដែលកំពុងតែមានការព្រួយបារម្ភនេះ។ ជាមួយគ្នានេះ បងប្អូនប្រជាពលរដ្ឋ ដែលមានការពាក់ព័ន្ធដោយផ្ទាល់ ឬដោយ ប្រយោល ឬបានចេញចូលទៅកាន់ទីតាំងផ្សារខាងលើ ត្រូវចូលរួមអនុវត្តចត្តាឡីស័កដាក់ខ្លួនឲ្យនៅដាច់ដោយឡែក។
រដ្ឋបាលខេត្តសូមក្រើនរំលឹកដល់អ្នកពាក់ព័ន្ធត្រូវបង្កើនស្មារតីខ្ពស់អនុវត្តតាមការណែនាំរបស់សមត្ថកិច្ចជាដាច់ ខាត។ ចំពោះជនទាំងឡាយណា មិនអនុវត្តតាមច្បាប់ និងលិខិតបទដ្ឋានគតិយុត្តនានាជាធរមាន គឺអាចប្រឈមនឹងទទួលទណ្ឌកម្មការពិន័យអន្តរការណ៍ រហូត ដល់ការផ្តន្ទាទោសដាក់ពន្ធនាគារផងដែរ។
រដ្ឋបាលខេត្តសៀមរាប មានកិត្តិយស សូមជម្រាបជូនសាធារណជនឱ្យបានជ្រាបថា៖ ក្នុងព្រឹត្តិការណ៍ការឆ្លងរាលដាលជំងឺកូវីដ-១៩ ចូលក្នុងសហគមន៍ ២០កុម្ភៈនេះ ខេត្តសៀមរាប បានរកឃើញអ្នកវិជ្ជមានជំងឺកូវីដ-១៩ថ្មី បន្ថែមចំនួន៣នាក់ សរុប ៤នាក់ នៅថ្ងៃទី១២ ខែមេសា ឆ្នាំ២០២១ រួមមាន ១.ឈ្មោះ ចាន់ ផុន ភេទស្រី អាយុ ២១ឆ្នាំ ២.ឈ្មោះ ជា គីម ភេទស្រី អាយុ ៥០ឆ្នាំ និង៣.ឈ្មោះ សរ សុវណ្ណារិទ្ធ ភេទប្រុស អាយុ ៥០ឆ្នាំ ដែលអ្នកទាំងបី មានមុខរបរជាអាជីវករលក់ដូរនៅផ្សារក្រោម និងជាក្រុមគ្រួសាររបស់ លោក អ៊ឹង ខៃលី ដែលវិជ្ជមានជំងឺកូវីដ-១៩ ហើយលោកស្រី ជា គីម ក៏ជាអាជីវករលក់ដូរនៅផ្សារវត្តអធ្វាផងដែរ។
គណៈបញ្ជាការឯកភាពរដ្ឋបាលខេត្ត បានសម្រេចបិទការចេញ-ចូលជាបណ្តោះអាសន្នផ្សារក្រោម ស្ថិតនៅភូមិវិហារចិន សង្កាត់ស្វាយដង្គំ និងបន្ថែមការបិទការចេញ-ចូលជាបណ្តោះអាសន្នផ្សារវត្តអធ្វា ស្ថិតនៅភូមិកក្រាញ់ សង្កាត់សៀមរាប ក្រុងសៀមរាប ចាប់ពីកាលបរិច្ឆេទសេចក្តីជូនដំណឹងនេះ រហូតដល់ មានសេចក្តីជូនដំណឹងជាថ្មី។
រដ្ឋបាលខេត្ត សូមបញ្ជាក់ជូនថា ករណីរកឃើញអ្នកវិជ្ជមានជំងឺកូវីដ-១៩ ចំនួន៤នាក់ នៅក្នុងថ្ងៃនេះ ជាករណីឆ្លងក្នុងសហគមន៍ ក្នុងខេត្តសៀមរាប និងឈានដល់ចំណុចដែលមានការព្រួយបារម្ភខ្ពស់ ដូចនេះ សូមបងប្អូនប្រជាពលរដ្ឋរស់នៅក្នុងភូមិមួយចំនួនក្នុងសង្កាត់ស្វាយដង្គំ សង្កាត់សៀមរាប សង្កាត់សាលាកំរើក និងសង្កាត់ជ្រាវ ដែលធ្លាប់បានចេញចូលក្នុងផ្សារក្រោម ផ្សារវត្តអធ្វា និងផ្សារពោធិ៍បន្ទាយជ័យ សូមបង្កើនការប្រុងប្រយ័ត្ន អនុវត្តវិធានការការពារ ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព។
ជាមួយគ្នានេះ រដ្ឋបាលខេត្តសៀមរាប សូមជម្រាបជូនបងប្អូនប្រជាពលរដ្ឋ ដែលបានពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានខាងលើ អ្នកលក់ដូរ និងអ្នកចេញចូលផ្សារក្រោម និងផ្សារ វត្តអធ្វា ចាប់ពីថ្ងៃទី២៤ ខែមីនា ឆ្នាំ២០២១ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
រដ្ឋបាលខេត្តសៀមរាប សង្ឃឹមយ៉ាងមុតមាំថា បងប្អូនប្រជាពលរដ្ឋទាំងអស់ ចូលរួមអនុវត្តឱ្យបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាល៕
រក្សាសិទ្ធិដោយ៖បញ្ញាស័ក្តិ
