រតនគិរី៖ ឯកឧត្តម ថង សាវុន អភិបាលខេត្តរតនគិរី នៅថ្ងៃទី១៥ខែមេសាឆ្នាំ២០២១ បានថ្លែងថា យោងតាមការណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ការងារចាក់វ៉ាក់សាំង គឺនៅតែដំណើរការធម្មតា រិតតែសម្រុកធ្វើទៀតផង ដោយមិនមានពន្យារពេល ឫផ្អាកនោះឡើយ ទោះជាមានការបិទ ឫបម្រាមមិនឱ្យចេញចូលពីខណ្ឌមួយទៅខណ្ឌមួយ ឫពីស្រុកមួយទៅស្រុកមួយ។
ឯកឧត្តម ថង សាវុន បានបន្តថា អ្នកដែលត្រូវចាក់លើកទីពីរ ចាំបាច់ត្រូវតែមកចាក់តាមពេលវេលាដែលបានកំណត់រួចហើយ ដោយប្រើប្រាស់កាតចាក់វ៉ាក់សាំងបង្ហាញអាជ្ញាធរមូលដ្ឋាន ឫសមត្ថកិច្ច ដើម្បីបានមកចាក់វ៉ាក់សាំងលើកទីពីរជាចាំបាច់។ រីឯ អ្នកដែលត្រូវចាក់លើកទីមួយ ជាភារកិច្ចរបស់អាជ្ញាធរមូលដ្ឋាន ឃុំ-សង្កាត់ ដែលត្រូវសម្របសម្រួលទទួលខុសត្រូវ ធ្វើយ៉ាងណាឱ្យក្រុមគោលដៅកំណត់រួចហើយនោះ ពួកគាត់បានទៅចាក់វ៉ាក់សាំងទៅតាមទីតាំងរៀងៗខ្លួន។
អ្នកដែលមិនត្រូវគោលដៅកំណត់របស់រាជរដ្ឋភិបាល មិនត្រូវអនុញ្ញាតឱ្យទៅចាក់នោះឡើយ ដោយរងចាំដល់វេនសឹមឱ្យទៅចាក់។ ជនបរទេស ដែលទទួលបានការអនុញ្ញាតឱ្យចាក់ហើយនោះ ខ្ញុំស្នើសុំក្រសួងការបរទេស ឫសាមីក្រសួង ដូចជាក្រសួងអប់រំ យុវជន និងកីឡា ដែលមានទីប្រឹក្សា ឫសាមីអង្គការដែលទទួលបានការណែនាំជាលិខិតពីក្រសួងការបរទេសរួចហើយនោះ ហើយដែលការស្នើសុំចាក់ទទួលបានការអនុញ្ញាតរួចហើយៗកំពុងតែដំណើរការចាក់នៅមជ្ឈមណ្ឌលគាំពារមាតា និងទារកជារៀងរាល់ថ្ងៃនេះ ធ្វើការបញ្ជាក់ជូនដោយមានលិខិតត្រឹមត្រូវជូនដល់អង្គការអន្តរជាតិ ឫសាមីទីប្រឹក្សាក្រសួង ដើម្បីអាចធ្វើដំណើរទៅចាក់វ៉ាក់សាំងបាន។ ជនបរទេស ដែលមានកាតចាក់វ៉ាក់សាំងលើកទីមួយរួចហើយនោះ ត្រូវប្រើកាតចាក់វ៉ាក់សាំងបង្ហាញសមត្ថកិច្ច ថាខ្លួនមានតម្រូវការទៅចាក់លើកទីពីរជាចាំបាច់ផងដែរ។ ខ្ញុំស្នើសុំឯកឧត្តម លោកជំទាវប្រធានអនុគណៈកម្មការចាក់វ៉ាក់សាំងកូវីដ-១៩ ក្នុងក្របខណ្ឌក្រសួង ឫរាជធានី-ខេត្ត សុំមេត្តាចាត់ចែងឱ្យមានប្រសិទ្ធិភាពខ្ពស់ ដើម្បីចៀសវាងនូវការខកខានរបស់បុគ្គលក្នុងការទៅទទួលយកវ៉ាក់សាំងទាំងលើកទីមួយ និងលើកទីពីរនេះ។ សូមឯកឧត្តមប្រធាន និងអនុប្រធានលេខាធិការដ្ឋាន គ.វ.ក-១៩ ធ្វើការសម្របសម្រួលបន្តទៀតជាមួយផ្នែកពាក់ព័ន្ធលើកិច្ចការនេះ។
ឯកឧត្តម ថង សាវុន សូមអរគុណជាអនេកនូវរាល់ការយកចិត្តទុកដាក់ទាំងអស់លើកិច្ចការដ៏សំខាន់នេះ។ សូមជូនពរឆ្នាំថ្មី សុខភាពល្អ ចៀសផុតការឆ្លងវីរុសកូវីដ-១៩ ជូនឯកឧត្តម លោកជំទាវទាំងអស់គ្នា និង ចូលឆ្នាំនៅផ្ទះ៕ រក្សាសិទ្ធិដោយ៖បញ្ញាស័ក្តិ
