អាជ្ញាធររដ្ឋតិចសាស់និយាយថា មនុស្សចំនួន២នាក់បានស្លាប់ក្រោយពេលរថយន្តដើរដោយថាមពលអគ្គីសនីម៉ាក Teslaរបស់លោក Elon Mask ដែលគេជឿថាប្រតិបត្តិការដោយគ្មានមនុស្សបើក បានបុកជាមួយដើមឈើមួយកាលពីថ្ងៃសៅរ៍ទី ១៧ពេលយប់នៅភាគជើងតំបន់ Houston ។
ពលបាលទី៤នៃក្រុង Harris County លោក Cinthya Umanzor បាននិយាយថា៖ មិនមាននរណាម្នាក់នៅអង្គុយចំកៅអីបើកបរនោះទេ។
ស្ថានីយទូរទស្សន៍ក្នុងស្រុកឈ្មោះ KHOU-TV បានបញ្ជាក់ថា រថយន្ត Tesla ម៉ូឌែល S សេរីឆ្នាំ២០១៩បានធ្វើដំណើរក្នុងល្បឿនយ៉ាងលឿននៅពេលដែលបរាជ័យក្នុងការបញ្ជាចង្កូតផ្លូវកោង ហើយបណ្តាលឱ្យដាច់ផ្លូវធ្លាក់បុកដើមឈើ និងផ្ទុះឆេះតែម្តង។
យ៉ាងណាមិញ សេចក្តីរាយការណ៍មួយដែលបានដកស្រង់ចេញពីសម្តីរបស់ភ្នាក់ងារពលបាលទី៤ទីក្រុងហារីសលោក Mark Herman បាននិយាយថា៖ ក្រោយពេលដែលភ្លើងត្រូវបានរលត់ អាជ្ញាធរក្នុងតំបន់បានរកឃើញថាមានមនុស្សចំនួន២នាក់ក្នុងរថយន្ត ដោយម្នាក់នៅអង្គុយកៅអីខាងមុខ និងម្នាក់ទៀតនៅខាងក្រោយ។
ក្រុមហ៊ុនផលិតរថយន្តម៉ាក Tesla និងរដ្ឋបាលសុវត្ថិភាពចរាចរណ៍ជាតិផ្លូវល្បឿនលឿនមិនទាន់អាចសុំការអត្ថាធិប្បាយនៅឡើយនោះទេគិតមកដល់ពេលនេះ។
បញ្ហាគ្រោះថ្នាក់នេះកើតមានឡើងចំពេលដែលមានការត្រួតពិនិត្យកាន់តែខ្លាំងរបស់ក្រុមហ៊ុន Tesla ទៅលើប្រព័ន្ធបើកបរពាក់កណ្តាលស្វ័យប្រវត្តិរបស់ខ្លួន បន្ទាប់ពីមានករណីគ្រោះថ្នាក់កើតឡើងថ្មីៗនេះ ហើយព្រមគ្នាជាមួយនេះដែរក្រុមហ៊ុនក៏កំពុងត្រៀមដាក់ដំណើរការកម្មវិធីបើកបរដោយស្វ័យប្រវត្តិដោយពេញលេញរបស់ខ្លួនដល់អតិថិជនឱ្យបានកាន់តែច្រើន។
ទីភ្នាក់ងារសុវត្ថិភាពរថយន្តរបស់សហរដ្ឋអាមេរិកបាននិយាយថា កាលពីខែមីនាខ្លួនបានបើការស៊ើបអង្កេតចំនួន២៧ករណីពាក់ព័ន្ធនឹងបញ្ហាគ្រោះថ្នាក់របស់រថយន្តម៉ាក Tesla ហើយយ៉ាងហោចណាស់៣ករណីបានកើតឡើងនាពេលថ្មីៗនេះ។
ស្ថាបនិក និង នាយកក្រុមហ៊ុន Tesla លោក Elon Musk បាននិយាយថាកាលពីខែមករាថា លោកសង្ឃឹមនឹងទទួលបានប្រាក់ចំណេញយ៉ាងច្រើនពីប្រព័ន្ធបើកបរដោយស្វ័យប្រវត្តិ។ លោកបន្ថែមថា លោកមានទំនុកចិត្តខ្ពស់ចំពោះរថយន្តរបស់លោកដែលនឹងអាចបើកបរដោយខ្លួនឯង ដោយជឿជាក់លើសពីការបើកបររបស់មនុស្សនៅក្នុងឆ្នាំនេះ។
បច្ចេកវិទ្យាបើកបើកដោយស្វ័យប្រវត្តិត្រូវជំនះឧបសគ្គសុវត្ថិភាព និងបទប្បញ្ញាត្តិដើម្បីទទួលបានភាពជោគជ័យលើផ្នែកពាណិជ្ជកម្ម៕
Source: រ៉យទ័រ