ក.ក.ន ÷ អស់លោក ប្រិយមិត្តអ្នកអានរបស់ CEN ជាទីគោរព នៅវេលាថ្ងៃត្រង់ ថ្ងៃទី២០ មេសា នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងសារ ជូនជនរួមជាតិរបស់លោកតាមរយៈទូរទស្សន៍ក្នុងស្រុកដោយគូសបញ្ជាក់អំពីដំណើរទស្សនកិច្ចការងារទៅចូលរួមកិច្ចប្រជុំដោយផ្ទាល់នៅឯទីក្រុង ហ្សាការតា ស្តីពីកិច្ចប្រជុំកំពូលអាស៊ានដ៏ពិសេសមួយ។
អាស៊ាន មានសមាជិកចំនួន ១០ប្រទេស អាស៊ានកំពុងមានចំណោទដ៏ធំមួយនោះគឺ វិបត្តិនយោបាយនៅ មីយ៉ាន់ម៉ា ដែលជំហររបស់រាជរដ្ឋាភិបាលកម្ពុជាបានចាត់ទុកវិបត្តិនយោបាយនៅ មីយ៉ាន់ម៉ា ជាកិច្ចការផ្ទៃក្នុងរបស់ប្រទេសនេះ ហើយអាស៊ានមានលក្ខណៈធ្វើសម្រេចចិត្តបែបកុងសង់ស៊ីស ពោលគឺ មូលមតិជាឯកច្ឆ័ន្ទ លើការដោះស្រាយរឿងអ្វីមួយ។
មជ្ឈមណ្ឌលព័ត៌មាន CEN យើងខ្ញុំសូមលើកយកអត្ថបទមួយដែលយើងប្រែសម្រួលពីកាសែត បាងកកប៉ុស្តិ៍ ដែលទាក់ទិននឹងការមិនចូលរួមរបស់ នាយករដ្ឋមន្ត្រីថៃ ក្នុងកិច្ចប្រជុំកំពូលអាស៊ាន ដោយចាត់ឲ្យរដ្ឋមន្ត្រីការបរទេសថៃ ជាអ្នកចូលរួមប្រជុំជំនួសលោកវិញ។
តើហេតុអ្វីទៅ? សូមអញ្ជើញអានអត្ថបទខាងក្រោមដូចតទៅ៖
នាយករដ្ឋមន្ត្រីថៃ ប្រាយុទ្ធ ចន្ទអូចា បានសម្រេចមិនចូលរួមកិច្ចប្រជុំកំពូលអាស៊ាន ដែលរៀបចំឡើងក្នុងរដ្ឋធានី ហ្សាការតា ប្ររទេសឥណ្ឌូណេស៊ី ដោយបញ្ជូនរដ្ឋមន្ត្រីការបរទេសទៅជំនួសវិញ។ នេះបើតាមប្រភពរដ្ឋាភិបាលថៃ នៅថ្ងៃចន្ទនេះ ដែលដកស្រង់ចុះផ្សាយដោយកាសែត បាងកកប៉ុស្តិ៍ ។ យ៉ាងណាមិញ ប្រភពដដែល ពុំបានបកស្រាយលម្អិតជុំវិញហេតុផលនៃការសម្រេចចិត្តរបស់លោក ប្រាយុទ្ធ ឡើយ។ ចំណែកលោករដ្ឋមន្ត្រីការបរទេសថៃ ដុន ប្រាម៉ុដវ៉ាន់ណៃ (Don Pramudwinai) នឹងតំណាងប្រទេសថៃនៅកិច្ចប្រជុំកំពូលអាស៊ានស្តីពីស្ថានការណ៍នៅប្រទេសមីយ៉ាន់ម៉ានេះ។
ជំនួបកំពូលពិសេសរបស់សមាគមប្រជាជាតិអាស៊ាន ហៅកាត់ថា អាស៊ាន នឹងរៀបចំឡើងក្នុងរដ្ឋធានី ហ្សាការតា ប្រទេសឥណ្ឌូណេស៊ី នាថ្ងៃសៅរ៍ ទី២៤ មេសា នេះ ក្នុងគោលដៅស្វះស្វែងរកដំណោះស្រាយសម្រាប់វិបត្តិនយោបាយក្នុងប្រទេស មីយ៉ាន់ម៉ា។ យោងតាមកាសែត បាងងកកប៉ុស្តិ៍ រដ្ឋមន្ត្រីការបរទេសថៃ អះអាងកាលពីថ្ងៃសៅរ៍ចុងសប្ដាហ៍មុននេះថា មេបញ្ជាការកងទ័ពមីយ៉ាន់ម៉ា ឧត្តមសេនីយ៍ មីង អ៊ុងឡាង ក៏នឹងមានវត្តមានក្នុងកិច្ចប្រជុំកំពូលអាស៊ាន នាពេលខាងមុខនេះផងដែរ។
ទោះបីជាបែបនេះក្តី រដ្ឋាភិបាលស្រមោល នៃមីយ៉ាន់ម៉ារបស់ អ្នកស្រី អ៊ុងសាន ស៊ូជី ក៏បានទទូចឲ្យមេដឹកនាំអាស៊ានផ្ដល់កៅអីឲ្យពួកគេ ដើម្បីចូលរួមក្នុងជំនួបកំពូលនេះផងដែរ។
សូមបញ្ជាក់ដែរថា មនុស្សជាង ៧០០នាក់ហើយ ត្រូវបានសម្លាប់ក្នុងការបង្ក្រាបបាតុកម្មនៅទូទាំងប្រទេសប្រឆាំងរបបសឹក ក្រោយរដ្ឋប្រហារ ថ្ងៃទី១ ខែកុម្ភៈ កន្លងមក ដែលបានផ្ដួលរំលំរដ្ឋាភិបាលស្របច្បាប់ មីយ៉ាន់ម៉ា៕
មជ្ឈមណ្ឌលព័ត៌មាន CEN
