ភ្នំពេញ ៖ ក្នុងសេចក្តីណែនាំស្ដីពីវិធានការលម្អិត ដើម្បីរឹតបន្តឹងការអនុវត្តសម្រេច ស្ដីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្ដាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចុះថ្ងៃទី១៨ ខែមេសា ឆ្នាំ២០២១ ត្រង់ចំណុចទី ៣ បានបញ្ជាក់ថា ÷
- បុគ្គលគ្រប់រូប ត្រូវបានហាមឃាត់ មិនឲ្យធ្វើដំណើរចេញពីលំនៅឋាន ឬផ្ទះសំណាក់បច្ចុប្បន្នរបស់ខ្លួន ដោយរួមទាំងការមិនអនុញ្ញាតឲ្យធ្វើសកម្មភាពកីឡា នៅខាងក្រៅលំនៅឋាន ឬទីសំណាក់របស់ខ្លួន លើកលែងតែការធ្វើដំណើរក្នុងមូលហេតុសុខភាពបន្ទាន់ និងការធ្វើដំណើរទៅជួបមន្ត្រីសុខាភិបាល ដើម្បីយកសំណាកទៅវិភាគមេរោគកូវីដ-១៩ ឬចាក់វ៉ាក់សាំងការពារជំងឺកូវីដ-១៩ ដូសទី២ នៅទីតាំងជិតបំផុតក្នុងតំបន់ក្រហម តាមការកំណត់ និងដោយមានការអនុញ្ញាតពីអាជ្ញាធរមានសមត្ថកិច្ច។
សូមបញ្ជាក់ថា ការចាក់វ៉ាក់សាំងកូវីដ-១៩ ស៊ីណូវ៉ាក់ និងស៊ីណូហ្វាម ត្រូវបាន ត្រូវបានគណៈកម្មការចំពោះកិច្ច ចាក់វ៉ាក់សាំងទូទាំងប្រទេស ចាប់ផ្ដើមដូសទី២ ជូនប្រជាពលរដ្ឋ មន្ត្រីរាជការចាប់ពីថ្ងៃទី២០ ខែមេសា ឆ្នាំ២០២១ រហូតដល់ថ្ងៃទី៣ ខែឧសភា ឆ្នាំ២០២១ នៅតាមទីកន្លែងដែលចិត្តបំផុតសម្រាប់លោក-អ្នក ដោយមិនអនុញ្ញាតឲ្យឆ្លងកាត់ពីរខណ្ឌមួយទៅខាងមួយនោះទេ។
គិតត្រឹមថ្ងៃទី២០ ខែមេសា ឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ-១៩ ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស សរុបចំនួន ១,២៧៧,៦៨៨នាក់នាក់។
- ក្រសួងសុខាភិបាល ចាក់បានចំនួន៖ ៩៨៣,១៤៥នាក់។
- ក្រសួងការពារជាតិ ចាក់បានចំនួន៖ ២៩៤,៥៤៣នាក់។
- សរុបចំនួន៖ ១,២៧៧,៦៨៨នាក់ (គិតថ្ងៃទី២០ ខែមេសា ឆ្នាំ២០២១)។
ដូច្នេះ សមត្ថកិច្ចដែលយាមប្រចាំការនៅចំណុចរនាំងដែកបិទខ្ទប់ គួរតែយល់ដឹងពីអាទិភាព នៃអ្នកទៅចាក់វ៉ាក់សាំងសម្រាប់ដុំទី២ ដែលមានចែងក្នុងសេចក្តីសម្រេចខាងលើ របស់រាជរដ្ឋាភិបាល៕ រក្សាសិទ្ធិដោយ : ពិសិដ្ឋ CEN
