ដូចដែលបានដឹងស្រាប់ហើយថា រាល់ការរៀបចំនៃការប្រែក្លាយទីតាំងធំៗទាំងប៉ុន្មានកន្លែង ឲ្យទៅជាមន្ទីរពេទ្យសម្រាប់ព្យាបាលបងប្អូនអ្នកជំងឺកូវីដ១៩ តាំងពីពេលកន្លងមក និងមកទល់ពេលនេះ គឺស្ថិតក្រោមការរៀបចំ និងចាត់ចែង ដោយកូនប្រុសច្បង និងកូនប្រសាស្រីរបស់សម្តេចតេជោ ហ៊ុន សែន ដែលយើងគ្រប់គ្នាបានស្គាល់ច្បាស់រួចហើយ គឺលោកឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ ចន្ទមុន្នី ដែលជាសមាជិកគណកម្មការប្រយុទ្ធប្រឆាំងជំងឺកូវីដ១៩ និងជាប្រធានក្រុមដឹកនាំក្រុមគ្រូពេទ្យសម្តេចតេជោ ប្រឆាំងកូវីដ១៩។
តែទោះយ៉ាងណា ដោយសារតែស្ថានភាពនៃការឆ្លងរីករាលវីរុសកូវីដ១៩ គឺនៅតែបន្តកើនឡើងយ៉ាងគំហុក ហេតុនេះដើម្បីទប់ទល់នឹងស្ថានភាពដ៏កំពុងប្រឈមមុខនេះ ឯកឧត្តម ហ៊ុន ម៉ាណែត និងភរិយា បានបន្តចុះបំពេញបេសកកម្មនេះ ដោយមិនអាចឈប់សម្រាកបានឡើយ ជាមួយក្រុមការងារ កងកម្លាំងសមត្ថកិច្ច ក្រុមគ្រូពេទ្យជួរមុខ និងផ្នែកពាក់ព័ន្ធទាំងអស់ ដើម្បីបន្តចាត់ចែងរៀបចំឲ្យមានមណ្ឌលព្យាបាលបម្រុងបន្ថែមទៀត ក្នុងករណីមានតម្រូវការចាំបាច់ក្នុងការទទួលព្យាបាលបងប្អូនប្រជាពលរដ្ឋដែលឆ្លងជំងឺកូវីដ១៩។
ជាក់ស្តែង នៅមុននេះបន្តិច ថ្ងៃទី២១ ខែមេសា ឆ្នាំ២០២១ នេះ តាមរយៈគណនីហ្វេសប៊ុកផ្ទាល់របស់ឯកឧត្តម ហ៊ុន ម៉ាណែត បានរៀបរាប់ឲ្យដឹងថា៖ «ក្នុងកាលៈទេសៈដ៏លំបាកនេះ ក្រុមការងារយើងមិនទាន់មានសិទ្ធិសម្រាកទេ… បន្ទាប់ពីបញ្ចប់ការរៀបចំមណ្ឌលព្យាបាលកូវីដ១៩ កម្រិតស្រាលនៅកោះពេជ្រជំហានទី២ ដែលបង្កើនចំនួនគ្រែសម្រាប់ព្យាបាលអ្នកជំងឺកូវីដ១៩ នៅមណ្ឌលកោះពេជ្រដល់ប្រមាណជិត២៦០០គ្រែ ក្រុមការងារបានបន្តទៅរៀបចំមណ្ឌលព្យាបាលជំងឺកូវីដ១៩ មួយកន្លែងទៀតនៅក្នុងខណ្ឌដង្កោ ដើម្បីត្រៀមទទួលព្យាបាលអ្នកជំងឺកូវីដ១៩ ក្នុងករណីមានតម្រូវការចាំបាច់។
ខ្ញុំនិងក្រុមការងារ សង្ឃឹមថាការឆ្លងនិងរីករាលដាលនៃជំងឺកូវីដ១៩ នឹងត្រូវបញ្ចប់នៅក្នុងពេលឆាប់គ្រប់មុខ ហើយទីតាំងដែលយើងរៀបចំទាំងនេះ នឹងមិនមានតម្រូវការប្រើប្រាស់នោះទេ ប៉ុន្តែទោះជាយ៉ាងណា ក៏យើងនឹងខិតខំប្រឹងប្រែងរៀបចំមណ្ឌលព្យាបាលជំងឺកូវីដ១៩ ទាំងនេះឲ្យបានឆាប់រហ័សនិងបានល្អ ក្នុងករណីមានតម្រូវការចាំបាច់ក្នុងការទទួលព្យាបាលបងប្អូនប្រជាពលរដ្ឋដែលឆ្លងជំងឺកូវីដ១៩។
សូមបងប្អូនប្រជាពលរដ្ឋទាំងអស់ ចូលរួមក្នុងការអនុវត្តឲ្យបានខ្ជាប់ខ្ជួននូវវិធានសុខាភិបាល (៣កុំ ៣ ការពារ) ក៏ដូចជាក្នុងការទទួលចាក់វ៉ាក់សាំងការពារជំងឺកូវីដ១៩ និងការគោរពគោលការណ៏អនុវត្តក្នុងការបិទខ្ទប់មួយរយៈពេលខ្លី ដើម្បីយើងរួមគ្នាទប់ស្កាត់ការរីករាលដាលនិងឈានដល់ការបញ្ចប់ជំងឺកូវីដ១៩ នៅក្នុងប្រទេសរបស់យើងបានឆាប់រហ័ស។»៕
រក្សាសិទ្ធិដោយ៖ លឹម ហុង
