ភ្នំពេញ ៖ ជឿជាក់ថា ប្រិយមិត្តនៅក្នុងបណ្តាញសង្គមហ្វេសប៊ុក នឹងមានការហួសចិត្តខ្លាំងហើយ ចំពោះទង្វើបុគ្គលសង្ឃវ័យក្មេងមួយអង្គ ដែលបាន Live វីដេអូច្រៀងបទចម្រៀងឆ្លងឆ្លើយមានចំណងជើងថា «កោតប្រុសមុខខ្មូរ» ផ្ញើទៅកាន់ម្ចាស់បេះដូងខ្លួនម្នាក់ ហៅសុទ្ធតែជាប្រពន្ធសម្លាញ់ពេញៗមាត់ ដោយមិនបានគិតថា ធ្វើបែបនេះវាខុសប្រាស់ចាកវិន័យព្រះពុទ្ធសាសនាសោះឡើយ។
តែយ៉ាងណា ក្រោយចម្រៀងមួយបទចូលតួបានយ៉ាងល្អនេះ ត្រូវបានចែករំលែកយ៉ាងផុសផុល ជាមួយមតិមហាជនដាក់ឲ្យធ្ងន់ៗ នៅទីបំផុត សង្ឃស្ទាវយកព្រះពុទ្ធសាសនាមកធ្វើជាល្បែងកម្សាន្តរូបនេះ ត្រូវបានចាប់ផ្សឹកហើយ។
នេះបើតាមគណនីហ្វេសប៊ុកឈ្មោះ Kroem Muy បានជូនដំណឹងថា៖ «គេផ្សឹកហើយ ខាងបាទី តាកែវ សម្រាប់បងប្អូនដែលបានដឹង ឃើញបុគ្គលកែមិនឡើងមួយចំនួនតូច គួរហ៊ានរាយការណ៍ជូនថ្នាក់លើ ដើម្បីបានបុគ្គលដែលខុសទាំងនោះទទួលការអប់រំ តាមគោលការណ៍វិន័យពុទ្ធសាសនាថា ខុសកម្រិតណា ត្រឹមអប់កែរប្រែ ខុសកម្រិតណាគេត្រូវផ្សឹកចោល? កុំស្ងៀមឈឹង បើមិនខ្មាសគេ ក៏ខ្មាសខ្លួនឯងដែរ ដែលដឹង ឃើញ ឮ អំពើខុសឆ្គង បែរជាជួយលាក់បាំង។ ទីណាក៏មានមនុស្សខុសដែរ តែកុំឃើញខុសហើយដើរហួសទៅមិនជួយកែរប្រែ វាស្មើនឹងបំផ្លាញដោយប្រយោល។»។
ក្នុងនោះ អ្នកប្រើប្រាស់បណ្តាញសង្គមម្នាក់ ព្រោះតែស្អប់ខ្លាំងពេក បានដាក់ធ្ងន់ៗបែបនេះថា៖ «បានតែនៅជិតអី ខោកឲ្យបែកក្បាលត្រងោលហ្នឹងហ្មង, អាញឹមស្រស់ណាស់អាថោក អាចោលម្សៀត,…»។ រីឯអ្នកខ្លះទៀត ក៏បានលើកឡើងបែបនេះថា៖ «បើដឹងថាចរិតកូនរបស់ខ្លួនកែលែងឡើងហើយ សូមអូសក្បាលពួកវាចូលទៅមណ្ឌលកែប្រែទៅ ក្នុងទីវត្តអារ៉ាមមិនមែន ជាមណ្ឌលទទួលពួកអាក្មេងបែកស្លុយដែលកែមិនឡើងនោះទេ បើនៅតែមានបុគ្គលប្រភេទៗបែបនេះទៀត ព្រះពុទ្ធសាសនាយើង នឹងអស់តម្លៃដោយសាពួកអាក្មេងបែកស្លុយប៉ុន្មានក្បាលនេះជាមិនខាន»៕ រក្សាសិទ្ធិដោយ៖ លឹម ហុង
