ទីភ្នាក់ងារសារព័ត៌មានរដ្ឋវៀតណាម V.N.A បានឲ្យដឹងថា កាលពីថ្ងៃទី១៩ ខែមេសា ឆ្នាំ២០២១ ដើមសប្តាហ៍នេះ ឯកឧត្តម ង្វៀន ហ្វូជុក អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាម បានផ្ញើសារសួរសុខទុក្ខមួយច្បាប់ជូនសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ក្រោយពីបានទទួលព័ត៌មានថា ប្រទេសកម្ពុជា ជាពិសេស រាជធានីភ្នំពេញ និងក្រុងតាខ្មៅ នៃខេត្តកណ្តាល ជាខេត្តមានព្រំប្រទល់ជាប់នឹងប្រទេសវៀតណាមកំពុងមានការឆ្លងជំងឺកូវីដ-១៩ ដ៏ធ្ងន់ធ្ងរ និងគួរឲ្យព្រួយបារម្ភ។
សារសួរសុខទុក្ខបានលើកឡើងអំពីស្ថានភាពរាតត្បាតនៃជំងឺកូវីដ-១៩ ដែលនៅតែបន្តប្រែប្រួលស្មុគស្មាញ ប៉ះពាល់ដល់ជីវភាពសង្គម-សេដ្ឋកិច្ចនៃប្រទេសនានា ដែលក្នុងនោះមានទាំងប្រទេសវៀតណាម និងកម្ពុជាផង ហើយវៀតណាម សូមវាយតម្លៃខ្ពស់ចំពោះវិធានការដែលគណបក្សប្រជាជនកម្ពុជា និងរាជរដ្ឋាភិបាលនៃព្រះរាជាណាចក្រកម្ពុជា បានប្រកាន់យក និងសំដៅបង្ការ និងប្រយុទ្ធប្រឆាំងនឹងជំងឺកូវីដ-១៩។
សារបានថ្លែងកោតសរសើរ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជឿជាក់លើសម្តេចតេជោ លើការណែនាំបញ្ជាដាច់ណាត់ ទៅលើរដ្ឋាភិបាលនៃព្រះរាជាណាចក្រកម្ពុជា ដែលមាន សម្តេចជាប្រមុខដឹកនាំ ថា នឹងសម្រេចបានដោយជោគជ័យនូវការរាំងស្កាត់ការរាតត្បាត និងត្រួតត្រាស្ថានការណ៍ជំងឺកូវីដ-១៩ បានក្នុងកាលវេលាដ៏ឆាប់បំផុត។
ក្នុងសារដដែលនេះ ក្រៅពីបានថ្លែងអំណរគុណដល់សម្តេចតេជោ ហ៊ុន សែន ប្រធានគណបក្សប្រជាជនកម្ពុជាព្រមទាំងរាជរដ្ឋាភិបាលកម្ពុជា ដែលបានយកចិត្តទុកដាក់ចាក់វ៉ាក់សាំង ជូនមន្ត្រីរាជការ អង្គទូតវៀតណាម និងជនជាតិកម្ពុជាដើមកំណើតវៀតណាម ដែលកំពុងបំពេញភារកិច្ច រៀនសូត្រ និងរស់នៅប្រទេសកម្ពុជា ឯកឧត្តម ង្វៀន ហ្វូជុក បានថ្លែងនូវការធានា អះអាង ជូនសមភាគីរបស់ ឯកឧត្តមថា ៖ “ ដោយមាននូវប្រពៃណីសាមគ្គីជាប្រពៃណី ជួយគ្នាទៅវិញទៅមកក្នុងគ្រាក្រ បក្ស-រដ្ឋ និងប្រជាជនវៀតណាម ត្រៀមជាស្រេចក្នុងកិច្ចការសហការ ជួយឧបត្ថម្ភគាំពារ ចែករំលែកបទពិសោធន៍តាមសមត្ថភាព និងលទ្ធភាព កៀកស្មា ជាមួយនឹងកម្ពុជាក្នុងសង្គ្រាមប្រយុទ្ធប្រឆាំងនឹងជំងឺកូវីដ-១៩ ដើម្បីប្រទេសយើងទាំងពីរឆាប់បានវិលទៅរកសភាពការណ៍ប្រក្រតីឡើងវិញ”៕
មជ្ឈមណ្ឌលព័ត៌មាន CEN
