ភ្នំពេញ ៖ អនុវត្តតាមសេចក្តីជូនដំណឹងរបស់ គណៈកម្មការចំពោះកិច្ចចាក់វ៉ាក់សាំងកូវីដ-១៩ នៅព្រឹកថ្ងៃទី២១ខែមេសានេះ គេបានឃើញបងប្អូនប្រជាពលរដ្ឋជាច្រើន បាននាំគ្នាទៅចាក់វ៉ាក់សាំងការពារជំងឺកូវីដ-១៩ជាលើកទី២ នៅតាមទីតាំងមួយចំនួន ដែលបានរៀបចំរួចដោយគណៈកម្មការចាក់វ៉ាក់សាំងកូវីដ-១៩ ក្នុងនោះគេបានឃើញទីតាំងមួយចំនួនមានបងប្អូនប្រជាពលរដ្ឋ ជាច្រើនបានសម្រុក ទៅចាក់វ៉ាក់សាំងកូវីដ-១៩ ដូសទី២នេះហើយនៅទីតាំងខ្លះទៀត ក៏មិនមានប្រជាពលរដ្ឋច្រើននាក់សម្រុលទៅចាក់ច្រើនដែរ ។
គួរបញ្ជាក់ដែរថា គណៈកម្មការចំពោះកិច្ចចាក់វ៉ាក់សាំងកូវីដ-១៩ បានធ្វើការផ្អាកបណ្ដោះអាសន្ន នូវការចាក់វ៉ាក់សាំងនេះ ចំនួនបីថ្ងៃ ហើយមកដល់ថ្ងៃទី ២០ មេសា គណៈកម្មការនេះ បានបើកឱ្យដំណើរការនៃការចាក់វ៉ាក់សាំងលើកទី២នេះ សម្រាប់បងប្អូនប្រជាពលរដ្ឋដែលបានចាក់លើកទីមួយរួច ហើយដើម្បីទប់ស្កាត់នូវការរីករាលដាលនៃជំងឺកូវីដ-១៩ ទៅតាមការសម្រេចរបស់រាជរដ្ឋាភិបាល ក្នុងការបិទខ្ទប់រាជធានីភ្នំពេញ១៤ថ្ងៃនោះ គណៈកម្មការចំពោះកិច្ចចាក់វ៉ាក់សាំងកូវីដ-១៩ បានសម្រេចជ្រើសរើសយកទីតាំងមួយចំនួន ដើម្បីអោយបងប្អូនប្រជាពលរដ្ឋ ទៅចាក់នៅទីតាំងទាំងនោះជាលើកទី២ ចៀសវាងការធ្វើដំណើរឆ្លងកាត់ពីខណ្ឌមួយ ទៅខណ្ឌមួយ ដែលបង្កឲ្យមានហានិភ័យខ្លាំងចំពោះ ការឆ្លងជំងឺកូវីដ-១៩៕ រក្សាសិទ្ធិដោយ៖បញ្ញាស័ក្តិ
