ភ្នំពេញ ៖ ប្រិយមិត្តជាច្រើន ប្រហែលជាបានឃើញហើយ ចំពោះវីដេអូថ្មីមួយទៀត នៅលើបណ្តាញសង្គម Tik Tok ដែលបង្ហាញឲ្យឃើញបុរស២នាក់ បើកឡានបណ្តើរ និងជល់ដបស្រាគ្នាបណ្តើរ ដោយបានបញ្ជាក់ទៅកាន់អ្នកមើលរាល់គ្នាថា «សម័យកូវីដ អត់មានកន្លែងផឹក ទាល់តែជិះឡានក្រឡឹងជុំវិញភ្នំពេញ ទើបទាន់សម័យ»។
ពិតណាស់ មហាជននៅពេលបានឃើញបែបនេះ ក៏បានដាក់ថា បុរសទាំងពីរនេះមិនខុសពីក្រុមផ្គើនដទៃទេ និងស្នើឲ្យសមត្ថកិច្ចគួរចាត់ គួរពិនិត្យមើលបុរសទាំងពីរនាក់ផង កុំឲ្យទាន់សម័យខ្លាំងពេក ខណៈគេគ្រប់គ្នាកំពុងតែលំបាក សឹងរកអ្វីហូបគ្មានផងនោះ បែរជាពួកខ្លួនជិះឡានជល់ស្រាគ្នាយ៉ាងរំភើយ។
តែយ៉ាងណា ក្រោយឃើញវីដេអូពួកខ្លួន ត្រូវបានផេក និងអាខោនហ្វេសប៊ុកជាច្រើន បន្តផុសយ៉ាងព្រោងព្រាត ធ្វើឲ្យមហាជនផ្ទុះប្រតិកម្មកាន់តែខ្លាំងឡើងនោះ នៅទីបំផុត ម្នាក់ក្នុងចំណោមពួកគេទាំងពីរដែលមានគណនីហ្វេសប៊ុកឈ្មោះ Huor Thim បានចេញមកធ្វើការបកស្រាយឡើងម៉ាស្អាតបែបនេះថា៖ «ខ្ញុំឈ្មោះ ហួ ធីម ភេទប្រុស អាយុ 26 ឆ្នាំ សូមធ្វើការបកស្រាយចំពោះវីដេអូខាងក្រោមនេះ។ ដោយខ្ញុំបាទបានឃើញ Page ក៏ដូចជាម្ចាស់អាខោន Facebook មួយចំនួនបានយកវីដេអូនេះទៅផុសជាសាធារណៈ កាលពីថ្ងៃទី20.04.2021 ដោយវីដេអូមួយនេះជាវីដេអូចាស់នោះទេ ហើយខ្ញុំបាទក៏មិនបានផុសក្នុង Acc facebook ខ្ញុំផ្ទាល់នោះដែរ ខ្ញុំបាទគ្មានគោលបំណងផ្គើនរដ្ឋាភិបាលនោះទេ សូមបងប្អូនកុំយល់ច្រឡំលើខ្ញុំទាំងពីរនាក់អី នេះជាវីដេអូចាស់ដែលផុសក្នុង acc tiktok (បងហួចិត្តមួយ) តាំងពីថ្ងៃទី11.04.2021 មកម្លេះ។ សូមអរគុណ បងប្អូនទាំងអស់គ្នា»។
ដើម្បីឲ្យកាន់តែជ្រាបច្បាស់ជាងនេះ ម្ចាស់គណនីខាងលើ ក៏បានចេញវីដេអូសុំទោស និងធ្វើការរៀបរាប់ បកស្រាយលម្អិតបន្ថែមទៀតផងដែរ៕ រក្សាសិទ្ធិដោយ៖ លឹម ហុង
