ភ្នំពេញ÷បុរសជនជាតិចិនបានបើករថយន្តម៉ាកអូឌីក្នុងល្បឿនលឿនបានបត់ស្តាំបម្រុងចូលកន្លែងស្នាក់នៅស្រាប់តែវ៉ាក់អើជាមួយម៉ូតូបានបួងចង្កូតជ្រុលទៅបុកចូលជញ្ជាំងកញ្ចក់សណ្ឋាគារតាយម៉េងបណ្តាលឲ្យបាក់ជញ្ជាំងអស់មួយផ្ទាំង សំណាងល្អមិនគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍ដែលកើតឡើងនៅវេលាម៉ោង ៩និង២០ នាទីយប់ថ្ងៃទី២៨ ខែឧសភាឆ្នាំ ២០២១ ស្ថិតនៅតាមបណ្ដោយផ្លូវព្រះមុនីវង្សក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ប្រភពព័ត៌មានពីសន្តិសុខម្នាក់នៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគាត់បានឃើញរថយន្តម៉ាកអូឌីមួយគ្រឿងពណ៌សពាក់ផ្លាកលេខ ភ្នំពេញ 2-AJ 1799 បើកបរដោយបុរសជនជាតិចិនធ្វើដំណើរតាមបណ្តោយផ្លូវព្រះមុនីវង្សក្នុងទិសដៅពីជើងមកត្បូងក្នុងល្បឿនលឿនខណៈមកដល់ចំណុចកើតហេតុជាប់សណ្ឋាគារតាយម៉េងបានបត់ស្តាំគោលបំណងចូលទៅកន្លែងស្នាក់នៅស្រាប់តែវ៉ាក់អើជាមួយម៉ូតូក៏បួងចង្កូតគេចទៅបុកចូលសណ្ឋាគារតាយម៉េងបាក់កញ្ចក់មួយផ្ទាំងនិងសម្ភារៈមួយចំនួន។ ចំណែកតៃកុងរថយន្តនៅកន្លែងកើតហេតុរង់ចាំការដោះស្រាយជាមួយម្ចាស់សណ្ឋាគារ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់រួចបានពិនិត្យជំវិញកន្លែងកើតហេតុក៏ឲ្យភាគីបង្កសម្របសម្រួលជាមួយតំណាងម្ចាស់សណ្ឋាគារ ដោយភាគីបង្កមិនចង់វែងឆ្ងាយក៏ព្រមសងក្នុងការជួសជុលទាំងអស់បញ្ចប់រឿងនៅកន្លែងកើតហេតុតែម្តងទៅ៕ រក្សាសិទ្ធិដោយ៖ សាមេត
