ភ្នំពេញ ÷ បុរសជនជាតិចិនម្នាក់ បានបើករថយន្តម៉ាកMGមួយគ្រឿងក្នុងល្បឿនលឿន បានជ្រុលទៅបុកម៉ូតូម៉ាក ZOOMER X ចំពីមុខពេញទំហឹងបណ្តាលឲ្យក្មេងស្រីម្នាក់ ខ្ទាតចេញពីម៉ូតូរងរបួសធ្ងន់ និងម្នាក់ទៀតបានខ្ទាតចូលក្រោមរថយន្តបើកអូសទៅមុខជាង ២គីឡូម៉ែត បណ្តាលឲ្យស្លាប់ក្នុងថ្លុកឈាម។ចំណែកឯតៃកុងរថយន្តបង្កជាជនជាតិចិន ត្រូវបានប្រជាពលរដ្ឋវាយទ្រោមរួចប្រគល់ឲ្យសមត្ថកិច្ច។
ហេតុការណ៍ដ៏រន្ធត់នេះដែរបានកើតឡើងកាលពីវេលាម៉ោង ១១និង៤០ នាទីយប់ថ្ងៃទី ២៩ ខែឧសភា ឆ្នាំ ២០២១ ចំណុចឃាត់បាននៅតាមបណ្ដោយផ្លូវ ១០៥ កែងនឹងផ្លូវ ៤៨៤ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
សពជនរងគ្រោះមានឈ្មោះ អានិត ភេទស្រី អាយុ១៨ឆ្នាំ មុខរបរសិស្ស បច្ចុប្បន្នស្នាក់នៅជិតកន្លែងកើតហេតុខាងលើ នៅខណ្ឌចំការមន។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេបានឃើញក្មេងស្រី ២នាក់ជិះម៉ូតូមួយគ្រឿងម៉ាក ZOOMER X ពណ៌ទឹកក្រូចលាយស ពាក់ផ្លាកលេខ ភ្នំពេញ1GI 8052 ធ្វើដំណើរតាមបណ្តោយផ្លូវ ៣៦០ ក្នុងទិសដៅពីលិចទៅកើតក្នុងល្បឿនមធ្យម ខណៈមកដល់ចំណុចកើតហេតុខាងលើស្រាប់តែគេឃើញរថយន្តមួយគ្រឿងទៀតម៉ាក MG ពណ៌ខ្មៅពាក់ផ្លាកលេខ 2BK 1937 បើកបរដោយបុរសជនជាតិតចិនធ្វើដំណើរតាមបណ្តោយផ្លូវ ១០៥ ក្នុងទិសដៅពីជើងទៅត្បូងក្នុងល្បឿនលឿនបានជ្រុលទៅបុកម៉ូតូ ZOOMER X ពេញទំហឹងបណ្តាលឲ្យក្មេងស្រីម្នាក់ខ្ទាតចេញពីមុខរថយន្តរងរបួសធ្ងន់ និងម្នាក់ទៀតអូសក្រោមរថយន្តជាង ២គីឡូដី ស្លាប់យ៉ាងអាណោចអាធ័ម។
ក្រោយពេលកើតហេតុសមត្ថកិច្ចមូលដ្ឋានចុះមកដល់រួចបានទំនាក់ទំនង ទៅខាងជំនាញក្រុងឲ្យចុះមកវាស់វែង យកម៉ូតូនិងរថយន្តបង្កទៅរក្សាទុកនៅខាងការរិយាល័យចរាចរណ៍ផ្លូវគោក នៃស្នងការរាជធានីភ្នំពេញ រង់ចាំដោយស្រាយនៅពេលក្រោយ។ ចំណែកសពបានធ្វើកំណត់ហេតុ រួចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ រក្សាសិទ្ធិដោយ៖ សាមេត
