ភ្នំពេញ÷ បុរសម្នាក់បានបើករថយន្តហាយឡែនឌ័រមួយគ្រឿង ក្នុងល្បឿនលឿន ខ្វះការប្រុងប្រយត្ន័បណ្តាលឲ្យរេចង្កូតទៅបុករបាំងថ្មពុះចែកទ្រូងផ្លូវ បាក់មួយកង់ទៅមុខលែងរួច ចំណែកម្ចាស់រថយន្តបង្កវិញរត់ឡើងលើកង់បី ជិះគេចខ្លួនបន្សល់ទុកតែរថយន្តនៅកន្លែងកើតហេតុ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ១០និង២០នាទីយប់ ថ្ងៃទី៣០ ខែឧសភា ឆ្នាំ២០២១ ស្ថិតនៅតាមបណ្តោយផ្លូវ ១៦១ សង្កាត់បឹងព្រលឹត ខណ្ឌ៧មករា រាជធានីភ្នំពេញ។
ប្រភពព័ត៍មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តហាយឡែនឌ័រព៍ណសមួយគ្រឿងពាក់ស្លាកលេខ ភ្នំពេញ 2-AL 1510 បើកបដោយបុរសម្នាក់ ធ្វើដំណើរតាមបណ្តោយផ្លូវ១៦១ ក្នុងទិសដៅពីជើងមកត្បូង ក្នុងល្បឿនលឿនខ្វះការប្រុងប្រយត្ន័ បណ្តាលឲ្យរេចង្កូតទៅបុករបាំងថ្មពុះចែកទ្រូងផ្លូវពេញទំហឹងបាក់អស់មួយកង់ សំណាងល្អនៅក្នុងហេតុការណ៍គ្រោះថ្នាក់ចរាចរណ៍នេះមិនបង្កឲ្យមាននណាម្នាក់រងរបួសនោះទេ រងការខូចខាតតែទ្រព្យសម្បត្តិរដ្ឋ និងរថយន្តតែប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋានបានចុះមកពិនិត្យដល់កន្លែងកើតហេតុ រួចក៏បានទំនាក់ទំនងទៅខាងផ្នែកជំនាញចរាចរណ៍ក្រុងឲ្យចុះមកវាស់វែង និងធ្វើកំណត់ហេតុយករថយន្តស្ទូចមកស្ទូចយករថយន្តបង្កខាងលើទៅរក្សាទុកនៅខាងការរិយាល័យចរាចរណ៍ផ្លូវគោក នៃស្នងការរាជធានីភ្នពេញរងចាំដោះស្រាយនៅពេលក្រោយ។ ដោយ ៖ សាមេត
