បាត់ដំបង៖ រដ្ឋបាលខេត្តបាត់ដំបងចេញសេចក្តីសម្រេច ស្តីពីការដាក់វិធានការរដ្ឋបាលជាបណ្តោះអាសន្ន បំរាមគោចរ និងរឹតត្បិតមូលដ្ឋាន អាជីវកម្មលក់ដូរអាហាររយៈពេល ១៤ថ្ងៃ ចាប់ពីថ្ងៃទី០២ ដល់ថ្ងៃទី១៥ ខែមិថុនា ឆ្នាំ២០២១ ក្នុងគោលបំណងទប់ស្កាត់ ការឆ្លងរាលដាលជំងឺកូវីដ-១៩ នៅទីប្រជុំជន ស្រុកកំរៀង។
ក្រោយពីបានរកឃើញ ករណីឆ្លងជំងឺកូវីដ ១៩ នៅស្រុកកំរៀង ចំនួន ៦៨ នាក់ និងអ្នកពាក់ព័ន្ធមួយចំនួនទៀត ក្នុងរយៈពេល០៣ថ្ងៃ ចាប់ពីថ្ងៃទី៣១ ខែឧសភា ឆ្នាំ២០២១ ដល់ថ្ងៃទី០២ ខែមិថុនា ឆ្នាំ២០២១ ដែលជាព្រឹត្តិការណ៍ ២០កុម្ភៈ រដ្ឋបាលខេត្ត ដាក់ចេញវិធានការរដ្ឋបាលជាបណ្ដោះអាសន្នបំរាមគោចរ និងរឹតត្បិតមូលដ្ឋានអាជីវកម្មលក់អាហារ រយៈពេល ១៤ថ្ងៃ ចាប់ពីថ្ងៃទី០២ ដល់ថ្ងៃទី១៥ ខែមិថុនា ឆ្នាំ២០២១ ក្នុងគោលបំណងទប់ស្កាត់ការឆ្លងរាលដាលនៃជំងឺកូវីដ- ១៩ ទីប្រជុំជនស្រុកកំរៀង ស្ថិតនៅឃុំបឹងរាំង ស្រុកកំរៀង ខេត្តបាត់ដំបង ដូចខាងក្រោម៖ – បំរាមគោចរចាប់ពីម៉ោង ១០:០០ នាទីយប់ រហូតដល់ម៉ោង ៥០០ នាទីព្រឹក ចំពោះការធ្វើដំណើរចេញ-ចូល តាមគ្រប់មធ្យោបាយ លើកលែងតែរថយន្តដឹកទំនិញក្នុងការនាំចេញ-នាំចូលទំនិញ ចំណុចច្រកទ្វារព្រំដែន អន្តរជាតិដូង។ មិនអនុញ្ញាតឱ្យមូលដ្ឋានអាជីវកម្មលក់អាហារ ដូចជា ភោជនីយដ្ឋាន អាហារដ្ឋាន ហាងកាហ្វេ ហាងភេសជ្ជៈ និងទីតាំងលក់អាហារតាមដងផ្លូវសាធារណៈ ទទួលអតិថិជនចូលមកទទួលទាននៅនឹងកន្លែង ប៉ុន្តែអាចលក់ជាលក្ខណៈវេចខ្ចប់បាន។ ករណីមានមូលដ្ឋានអាជីវកម្មលក់អាហារ ណាមួយ ដែលមិនអនុវត្តតាមសេចក្ដីសម្រេចនេះនឹងត្រូវដកហូតលិខិតអនុញ្ញាតបើកអាជីវកម្ម ឬធ្វើការបិទអាជីវកម្ម។
ដើម្បីកាត់ផ្ដាច់ខ្សែចម្លងនូវជំងឺកូវីដ-១៩ រដ្ឋបាលខេត្តបាត់ដំបង ក៏ដូចជា អាជ្ញាធរស្រុកកំរៀង បានសម្រេចបិទខ្ទប់ផ្ទះរបស់ប្រជាពលរដ្ឋជាង ១០០ខ្នងបន្ថែមទៀត ក្រោយរកឃើញអ្នកឆ្លងជំងឺកូវីដ-១៩ ច្រើននាក់ជាថ្មីទៀត។
លោក សុខ គឹមខុន អភិបាលស្រុកកំរៀង បានប្រាប់ឲ្យដឹងថា រយ:ពេលចុងក្រោយនេះ មន្ត្រីសុខាភិបាលប្រចាំមូលដ្ឋាន បានស្រាវជ្រាវរកឃើញអ្នកកើតមានជំងឺកូវីដ-១៩ ឆ្លងថ្មីជាច្រើនជាបន្តបន្ទាប់កើនដល់ ៥០នាក់ គិតត្រឹមថ្ងៃទី២ ខែមិថុនា ឆ្នាំ២០២១នេះ។ ទន្ទឹមនឹងការរកឃើញប្រជាពលរដ្ឋបានឆ្លងជំងឺដ៏កាចសាហាវនេះមន្ត្រីអាជ្ញាធរពាក់ព័ន្ធទាំងអស់ ក្រោមកិច្ចសហការជាមួយក្រុមគ្រូពេទ្យ កំពុងអនុវត្តការងារយកវត្ថុសំណាកដើម្បីតេស្តរហ័ស រួមទាំងកំពុងបន្តស្រាវជ្រាវស្វែងរកអ្នកប៉ះពាល់ផ្ទាល់ និងប្រយោលបន្ថែមទៀតធ្វើយ៉ាងណាទប់ស្កាត់ឲ្យមានប្រសិទ្ធភាពនូវការរីករាលដាលនូវជំងឺខាងលើ។
លោកបន្តថា អត្រាដែលរកឃើញឆ្លងថ្មី ហក់ឡើងខ្ពស់នេះ ភាគច្រើនជាប្រជាពលរដ្ឋដែលធ្វើការងារនៅក្នុងខេត្តប៉ៃលិន ក្រោយតំបន់មួយនោះ រកឃើញករណីវិជ្ជមានឆ្លងច្រើន ក៏នាំគ្នាចាកចេញត្រឡប់មកស្រុកកំណើត ក្នុងស្រុកកំរៀងវិញ។ ហើយមកដល់ពេលនេះ អាជ្ញាធរខេត្តបាត់ដំបង បានសម្រេចប្រើវិធានការបន្ទាន់បិទខ្ទប់ផ្ទះ របស់បងប្អូនប្រជាពលរដ្ឋជាង ១០០ខ្នងដើម្បីកាត់ផ្តាច់ខ្សែចម្លងជំងឺកូវីដ-១៩៕ រក្សាសិទ្ធិដោយ៖បញ្ញាស័ក្តិ
