ភ្នំពេញ ៖ រថយន្តដែលមិនទាន់បានប្រកាសបង់ពន្ធ នៅតែធ្វើចរាចរនៅលើដងផ្លូវ ត្រូវបានក្រុមការងារចម្រុះនៃអគ្គនាយកដ្ឋាន ពន្ធដារចុះត្រួតពិនិត្យលើ យានយន្តណាដែលមិនទាន់បង់ពន្ធប្រភេទ ហើយអគ្គនាយកដ្ឋានពន្ធដារតម្រូវឱ្យរថយន្តបង់ប្រាក់ពន្ធ រួមទាំងប្រាក់ពិន័យមានប្រមាណជាង ១,២២ លានដុល្លារ។
បើតាមសេចក្តីប្រកាសរបស់អគ្គនាយករដ្ឋានពន្ធដារ ៖ គិតត្រឹមថ្ងៃទី១៥ ខែមីនា ឆ្នាំ២០១៨ អគ្គនាយកដ្ឋានពន្ធដារ រួមជាមួយកម្លាំងសមត្ថកិច្ចពាក់ព័ន្ធ បានធ្វើការផាកពិន័យនៅនឹងកន្លែងគោលដៅត្រួតពិនិត្យ និងបានរកឃើញថាក្នុងក្របខ័ណ្ឌទូទាំងប្រទេស មានរថយន្តចំនួន ៥.៨២៣ គ្រឿង ដែលមិនបានមកប្រកាសបង់ពន្ធបានទាន់ពេលវេលា ស្របតាមការកំណត់ដោយច្បាប់ ហើយរថយន្តទាំងនោះ ត្រូវបានតម្រូវឱ្យបង់ប្រាក់ពន្ធ រួមទាំងប្រាក់ពិន័យមានចំនួន ៤.៩១៥លានរៀល (ប្រមាណជាង ១,២២ លានដុល្លារ)។ ដោយសង្កេតឃើញមាន រថយន្តដែលមិនទាន់បានប្រកាសបង់ពន្ធ នៅតែធ្វើចរាចរនៅលើដងផ្លូវនៅឡើយ ដូច្នេះក្រុមការងារចម្រុះនៃអគ្គនាយកដ្ឋានពន្ធដារនៅតែបន្តយុទ្ធនាការចុះត្រួតពិនិត្យលើ យានយន្តណាដែលមិនទាន់បង់ពន្ធប្រភេទនេះតទៅទៀត ដើម្បីពង្រឹងវប្បធម៌នៃការបង់ពន្ធ និងបង្កើនប្រសិទ្ធភាព ស័ក្តិសិទ្ធិភាព នៃការប្រមូលពន្ធលើមធ្យោបាយដឹកជញ្ជូនគ្រប់ប្រភេទ ប្រកបដោយតម្លាភាព សមភាព និងអស់សក្តានុពល។
ជាថ្មីម្តងទៀត អគ្គនាយកដ្ឋានពន្ធដារមានបំណងផ្តល់ការក្រើនរំលឹក ក៏ដូចជាការប្រកាសជាព័ត៌មានជូនដល់ម្ចាស់ក្រុមហ៊ុន ឬម្ចាស់សហគ្រាស ក៏ដូចជាសាធារណជន រួសរាន់អញ្ជើញទៅប្រកាសបង់ពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៧ ឱ្យបានគ្រប់ៗគ្នា នៅតាមសាខាពន្ធដារខេត្ត-ខណ្ឌ ឬនៅសាខាធនាគារកាណាឌីយ៉ា ក.អ ឬនៅសាខាធនាគារអេស៊ីលីដា ភីអិលស៊ី ឬនៅសាខាធនាគារវឌ្ឍនៈ ឬនៅសាខាធនាគារកម្ពុជាសាធារណៈណាមួយ ដើម្បីចៀសវាងនូវការឃាត់យានយន្តតាមដងផ្លូវ ដោយមន្ត្រីពន្ធដារ និងកងកម្លាំងមានសមត្ថកិច្ច ដែលអាចនាំឱ្យមានការកកស្ទះ ចរាចរណ៍ធ្វើដំណើរ ខាតពេលវេលា និងអាចកើតមាននូវបាតុភាពអសកម្មដោយប្រការណាមួយជាយថាហេតុ។
សូមជម្រាបថា អគ្គនាយកដ្ឋានពន្ធដារសហការជាមួយ អាជ្ញាធរមានសមត្ថកិច្ច ចាប់ពីថ្ងៃទី២ ខែកុម្ភៈ ឆ្នាំ២០១៨មក បាននិងកំពុងចុះតាមគោលដៅសំខាន់ៗ ដើម្បីត្រួតពិនិត្យការអនុវត្តប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ សម្រាប់ឆ្នាំ២០១៧ ក្នុងក្របខ័ណ្ឌទូទាំងប្រទេស៕ ដោយ ៖ បញ្ញាស័ក្តិ