កំពង់ឆ្នាំង ៖ ក្មេងស្រីម្នាក់ត្រូវរថយន្តបុកបណ្តាលអោយបាក់កស្លាប់ភ្លាមៗនៅនឹងកន្លែងកើតហេតុ ក្នុងខណះពេលដែលក្មេងស្រីរងគ្រោះកំពុងឈរលេងនៅលចិញ្ចើមផ្លូវ។ ហេតុ ការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង១៧និង៣៥នាទី ថ្ងៃទី២៤ ខែតុលា ឆ្នាំ២០១៧ ក្នុងភូមិតាំស្យា ឃុំក្បាលទឹក ស្រុកទឹកផុស ខេត្តកំពង់ឆ្នាំង។ ជនរងគ្រោះឈ្មោះសេង រ៉ូហ៊ី ភេទស្រី អាយុ៧ឆ្នាំ មានទីលំនៅក្នុងភូមិ ឃុំខាងលើ។
តាមរបាយការណ៍ប៉ូលីសមូលដ្ឋានបានអោយដឹងថា នៅមុនពេលកើតហេតុគេឃើញរថយន្តម៉ាកតូយ៉ូតាកាមារីស្លាម ពណ៌ខ្មៅ ពាក់ផ្លាកលេខភ្នំពេញ 2J.4084 បើកបរក្នុងទិសដៅពីលិចទៅទិសខាងកើត បើកបរដោយឈ្មោះគង់ ធី ភេទប្រុស អាយុ៤៥ ឆ្នាំ រស់នៅក្នុងភូមិចោងម៉ោង ឃុំចោងម៉ោង ស្រុកទឹកផុស ខេត្តកំពង់ឆ្នាំង ។ ពេលបើកមកដល់ចំណុចខាងលើក៏បានបុកក្មេងស្រីរងគ្រោះពេញមួយទំហឹង ដែលកំពុងឈរលេងនៅលើចិញ្ចើមផ្លូវ បណ្តាលអោយបាក់កស្លាប់ភ្លាមៗតែម្តង ។
របាយការណ៍បានអោយដឹងទៀតថា ក្រោយពេលកើតហេតុរថយន្តបង្កបានបើករត់គេចមិនចង់ទទួលខុសត្រូវ ប៉ុន្តែត្រូវសមត្ថកិច្ចនគរបាលស្រុកសហការជាមួយកំលាំងនគរបាលប៉ុស្ថិក្បាលទឹក និង ប៉ុស្តិ៍ទួលខ្ពស់ ស្ទាក់ចាប់បាន នៅក្នុងភូមិរកាទង ឃុំទួលខ្ពស់ ស្រុកទឹកផុសនិងបានអូសយកមករក្សាទុកនៅអធិការដ្ឋាននគរបាលស្រុកទឹកផុស ដើម្បីចាត់ការបន្តទៅតាមនីតិវិធី៕ ដោយ៖ សន សក្តា
