រដ្ឋាភិបាលនៅក្នុងទីក្រុងសេអ៊ូល ប្រទេសកូរ៉េខាងត្បូង នឹងធ្វើការណែនាំពីវិធានការថ្មីមួយ ដើម្បីបង្ខំឲ្យបុគ្គលិករបស់ខ្លួនទាំងអស់ ចេញពីធ្វើការទៀងម៉ោង និងដើម្បីកុំឲ្យពួកគេធ្វើការលើសម៉ោង ដោយរដ្ឋាភិបាលនឹងធ្វើការបិទប្រព័ន្ធកុំព្យូទ័រទាំងអស់ចាប់ពីម៉ោង ៨យប់។ នេះបើតាមការចេញផ្សាយរបស់ BBC។
រដ្ឋាភិបាលកូរ៉េខាងត្បូងបញ្ជាក់ថា ការដែលចេញកម្មវិធីនេះគឺដើម្បីបញ្ឍប់វប្បធម៌ធ្វើការលើសម៉ោង។ ប្រទេសកូរ៉េខាងត្បូង មានម៉ោងធ្វើការលើសម៉ោង ច្រើនជាងគេបំផុតក្នុងពិភពលោក។
បុគ្គលិករដ្ឋាភិបាលនៅក្នុងក្រុងសេអ៊ូល ធ្វើការជាមធ្យមចំនួន ២.៧៣៩ម៉ោង ក្នុងមួយឆ្នាំ ដែលចំនួននេះគឺលើសរហូតដល់ ១.០០០ម៉ោង លើបុគ្គលិករដ្ឋ នៅក្នុងប្រទេសអភិវឌ្ឍន៍ដទៃ។
ការអនុវត្តកម្មវិធីនេះនឹងត្រូវធ្វើឡើងក្នុងរយៈពេល ៣ដំណាក់កាល នៅក្នុងពេល ៣ខែខាងមុខ។ កម្មវិធីនេះនឹងត្រូវចាប់ផ្តើមអនុវត្តនៅថ្ងៃទី ៣០ ខែមីនានេះ ដោយកុំព្យូទ័រទាំងអស់នឹងត្រូវបិទមុនម៉ោង ៨ ៕ សុភ័ក្ត្រ
