ខេត្តក្រចេះ ៖ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ អមដំណើរដោយឯកឧត្តម ឯក រដ្ឋ អនុរដ្ឋលេខាធិការ ឯកឧត្តម គឹម សាន់ អនុរដ្ឋលេខាធិការ លោក តាំង ពៅ ប្រធានលេខាធិការដ្ឋាននៃគណៈកម្មាធិការសម្របសម្រួលអចិន្ត្រៃយ៍ និងមន្ត្រីបច្ចេកទេសពាក់ព័ន្ធចុះពិនិត្យមើលវឌ្ឍនភាព នៃការងារសាងសង់ស្ថានីយជញ្ជីងអចល័ត ៣ទីតាំង ដែលមានក្នុងខេត្តក្រចេះ ខេត្តកែប និងខេត្តព្រះវិហារ។
ស្ថានីយជញ្ជីងអចល័តកាំពី ស្ថិតនៅ PK352+200 ផ្លូវជាតិលេខ៧ នៃស្រុកចិត្របុរី ខេត្តក្រចេះ បានសាងសង់រួចរាល់ ហើយគ្រោងនឹងដាក់ឱ្យដំណើរការក្នុងខែសីហា ឆ្នាំ២០២១។ ចំណែកឯស្ថានីយជញ្ជីងអចល័តដំណាក់ចង្អើរ-ខេត្តកែបស្ថិតនៅលើកំណាត់ផ្លូវជាតិលេខ៣៣ PK២១ +៥៩៥ ស្រុកដំណាក់ចង្អើរ ខេត្តកែប ទើបតែសាងសង់បានប្រមាណ២០% និងគ្រោងដាក់ឱ្យដំណើរការនៅដើមឆ្នាំ២០២២។ ដូចគ្នានេះដែរ ស្ថានីយជញ្ជីងអចល័តអូរពោធិ៍-ខេត្តព្រះវិហារ ស្ថិតនៅលើផ្លូវជាតិលេខ៦២ PK៥២+០០០ ក្នុងស្រុករវៀង ខេត្តព្រះវិហារ សម្រេចការសាងសង់បានប្រមាណ ៤០% ហើយគ្រោងនឹងដាក់ឱ្យដំណើរការនៅដើមឆ្នាំ២០២២។
ក្រសួងសាធារណការ និងដឹកជញ្ជូន សូមរំលឹកជូនដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ដែរថា ដើម្បីទប់ស្កាត់ការដឹកលើសទម្ងន់កម្រិតកំណត់ ក្រសួងនឹងបន្តអនុវត្តតាមច្បាប់ស្តីពី ផ្លូវថ្នល់មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់យ៉ាងតឹងរ៉ឹងបំផុតដោយគ្មានការលើកលែងឡើយ ដែលយានយន្តដឹកលើសទម្ងន់កម្រិតកំណត់ ២០%ត្រូវពិន័យ និងឃាត់ទុកមួយឆ្នាំ។
សូមម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ ចូលរួមជាមួយក្រសួងសាធារណការ និងដឹកជញ្ជូន និងរាជរដ្ឋាភិបាល ដើម្បីគោរព និងអនុវត្តតាមបទប្បញ្ញត្តិច្បាប់ និងរួមចំណែកការពារហេដ្ឋារចនាសម្ព័ន្ធផ្លូវថ្នល់ ជាប់គង់វង្សតាមអាយុកាលកំណត់ ៕ រក្សាសិទ្ធិដោយ៖បញ្ញាស័ក្តិ
