ថ្មីៗនេះ អ្នកប្រើប្រាស់បណ្តាញសង្គម ពិតជាមានការភ្ញាក់ផ្អើលជាខ្លាំង បន្ទាប់ពីបានទំព័រហ្វេសប៊ុកមួយ បានបង្ហោះនូវបណ្តារូបភាពជាច្រើនសន្លឹក បង្ហាញម៉ូតរថយន្តស៊ែរីទំនើបមួយប្រភេទឈ្មោះ Granada ជំនាន់ទី១ ជាផលិតផលរបស់ក្រុមហ៊ុន Ford ដ៏ល្បីផលិតនៅចន្លោះឆ្នាំ ១៩៧៥ ដល់ឆ្នាំ ១៩៨០ គឺធ្លាប់ត្រូវបានប្រើប្រាស់ដោយលោក នួន ជា ដែលជាអតីតមេដឹកនាំកំពូលរបស់ខ្មែរក្រហម។
នេះបើតាមទំព័រហ្វេសប៊ុកឈ្មោះថា 963 Classic បានសរសេរបញ្ជាក់ឲ្យដឹងយ៉ាងដូច្នេះថា បើយោងតាមប្រសាសន៍របស់លោកព្រះចៅអធិការវត្តព្រះឥន្ទកោសីយ៍ខេត្តសៀមរាប រថយន្តនេះធ្លាប់ប្រើប្រាស់ដោយលោក នួន ជា នៅក្នុងសម័យខ្មែរក្រហម។
តែក្រោយមក សម្ដេច ទេព វង្ស បានអញ្ជើញមកខេត្តសៀមរាប ហើយប្រគល់រថយន្តនេះឲ្យព្រះចៅអធិការវត្តព្រះឥន្ទកោសីយ៍ថែរក្សា ប៉ុន្តែរថយន្តត្រូវបានទុកចោល ដោយសារមានសភាពទ្រុឌទ្រោម លោកព្រះចៅអធិការក៏ប្រគល់បន្តឱ្យលោក គង់ មង្គល ជាប្រធានសមាគមបឹងពារាំងនៅខេត្តសៀមរាបថែរក្សាបន្ត។
ទំព័រហ្វេសប៊ុកខាងលើ ក៏បានបញ្ជាក់ឲ្យដឹងផងដែរថា មានជនបរទេសធ្លាប់ឲ្យតម្លៃរថយន្តនេះរហូតដល់ ៤ ម៉ឺនដុល្លារ តែលោកមិនលក់ដោយមូលហេតុថា លោកចង់ថែរក្សា និងអភិរក្សរថយន្តនេះ៕ រក្សាសិទ្ធិដោយ៖ លឹម ហុង
