ទំហំជួញដូរសរុបរបស់ទីផ្សារនៅថ្ងៃអង្គារ បានបន្តធ្លាក់ចុះមកតិចជាង ១ប៊ីលានរៀល ជាលើកទី២នៅក្នុងសប្តាហ៍នេះ

ភ្នំពេញ ៖ ថ្លៃភាគហ៊ុន អេស៊ីលីដា បានបន្តធ្លាក់ចុះ ៨០ រៀល ក្នុងមួយហ៊ុន បន្ថែមទៀត ដោយបានបិទត្រឹមថ្លៃ ១២,៨២០ រៀល។
ស្របពេល ជាមួយគ្នានេះ ភាគហ៊ុនរដ្ឋាករទឹកស្វយ័តក្រុងភ្នំពេញ និងផេសថិក ក៏បានធ្លាក់ចុះ ២០រៀល និង ៤០ រៀល រៀងគ្នា មកត្រឹម ៧,០៨០រៀល និង ៣,១១០ រៀល។

ភាគហ៊ុនហ្ក្រេនធ្វីន និង កំពង់ផែស្វយ័តក្រុងព្រះសីហនុ បានកើន ឡើង ៤,១៨០រៀល និង ១៣,៦៨០រៀល ដោយមានកំណើន ២០ និង ៨០រៀលក្នុងមួយហ៊ុនរៀងគ្នា។ ភាគហ៊ុនតំបន់សេដ្ឋកិច្ចពិសេសភ្នំពេញ បានកំពង់ផែស្វយ័តក្រុងភ្នំពេញ បានរក្សាថ្លៃដដែល។

សន្ទស្សន៍ផ្សារមូលបត្រកម្ពុជា បានធ្លាក់ចុះ ០.៣៨ភាគរយ បន្ថែមទៀត មកត្រឹម ៥៤១.០៦ ពិន្ទុ។ ភាគហ៊ុនតំបន់សេដ្ឋកិច្ចពិសេសភ្នំពេញ បានបន្តរក្សាថ្លៃដដែល នៅលើទីផ្សារ ប៉ុន្តែបានក្លាយជាភាគហ៊ុនដែលត្រូវបានជួញដូរ ច្រើនជាងគេទី២បន្ទាប់ពីភាគហ៊ុនអេស៊ីលីដា ក្នុងថ្ងៃអង្គារនេះ ក្រោយពីការចេញនូវសេចក្តីប្រកាសថ្មីរបស់ខ្លួន កាលពីថ្ងៃចន្ទ ស្តីពីការផ្លាស់ប្តូរមកកាន់កាប់ភាគហ៊ុនទាំងស្រុងរបស់ក្រុមហ៊ុន សហ័ស អ៊ី&ស៊ី ឯក ពីថ្ងៃនេះតទៅ ដែលនឹងក្លាយ ជាប្រភពចំណូឡពេញលេញបន្ថែមរបស់ តំបន់សេដ្ឋកិច្ចពិសេស ភ្នំពេញ។

ទំហំជួញដូរភាគហ៊ុនសរុបមានចំនួន ៧៦១.១៨លានរៀល។ គួរបញ្ជាក់ផងដែរថា ទំហំជួញដូរសរុបរបស់ទីផ្សារនៅថ្ងៃអង្គារនេះ បានបន្តធ្លាក់ចុះមកតិចជាង ១ប៊ីលានរៀល ជាលើកទី២នៅក្នុងសប្តាហ៍នេះ៕
រក្សាសិទ្ធិដោយ៖CEN