ភ្នំពេញ៖ ដោយសារការរីករាលដាលនៃជំងឺកូវីដ- ១៩ បានធ្វើឱ្យប៉ះពាល់យ៉ាងខ្លាំងដល់វិស័យអាកាសចរណ៍។ នៅកម្ពុជា វិស័យអាកាសចរណ៍ បានធ្លាក់ចុះជាង ៩០ភាគរយ ក្នុងរយៈពេល៥ខែឆ្នាំ២០២១នេះ ប៉ុន្តែការដឹកជញ្ជូនទំនិញតាមផ្លូវអាកាស មិនធ្លាក់ចុះនោះទេ។
នេះបើតាមមអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា ឯកឧត្ដម ស៊ីន ចាន់សិរីវុត្ថា បានឱ្យដឹងថា គិតត្រឹមចុងខែឧសភាឆ្នាំ២០២១នេះ វិស័យដឹកជញ្ជូនតាមផ្លូវ អាកាសនៅកម្ពុជាធ្លាក់ចុះចន្លោះពី៩២-៩៤ភាគរយ ប៉ុន្តែការដឹកជញ្ជូនទំនិញតាមផ្លូវអាកាស មានការងើបឡើងវិញបន្តិច ដោយសារតែមានតម្រូវការប្រើប្រាស់ទំនិញច្រើន ដូចជា ទំនិញតាមអនឡាញ និងការដឹកជញ្ជូនទំនិញផ្សេងៗទៀត ជាពិសេសការដឹកជញ្ជូនវ៉ាក់សាំង ម៉ាស និងបរិក្ខាពេទ្យជាដើម។
ដោយឡែកសម្រាប់ការដឹកជញ្ជូនអ្នកដំណើរវិញ ត្រូវបានមន្រ្តីអ្នកនាំពាក្យរដ្ឋលេខាធិការដ្ឋានអាកាសចរស៊ីវិលឱ្យដឹងថា រយៈពេល៥ខែ ឆ្នាំ២០២១នេះ អាកាសយានដ្ឋានអន្តរជាតិទាំង៣ របស់កម្ពុជា ទទួលបានអ្នកដំណើរបានចំនួន ១១៥ ៣៥៣នាក់ ស្មើនឹង ៤១៣៤ ជើង ខណៈការដឹកជញ្ជូនទំនិញមានចំនួន ២២ ៩៧៣ តោន។
បើតាមការព្យាករណ៍របស់អ្នកជំនាញ ការធ្វើដំណើរតាមផ្លូវអាកាស អាចនឹងល្អប្រសើរឡើងវិញ នៅក្នុងឆ្នាំ២០២៣ខាងមុខ។ បើតាមការរំពឹងរបស់ក្រុមហ៊ុនផលិតយន្ដហោះធំៗ២ គឺ Boeing និង Airbus ការហោះហើរមានប្រក្រតីភាពឡើងវិញ អាចក្នុង អំឡុងឆ្នាំ២០២៣-២០២៤ ខាងមុខផងដែរ។
គួរបញ្ជាក់ថា ឆ្នាំ២០២០ កន្លងទៅ ចំនួនអ្នកដំណើរដែលបានធ្វើដំណើរតាមផ្លូវអាកាស មកកម្ពុជា មានជាង ២លាន ដែលចំនួននេះ មានការធ្លាក់ចុះជាង ៨០% បើធៀបនឹងពេលដូចគ្នា ឆ្នាំ២០១៩ ហើយមូលហេតុចំបងនៃការធា្លក់ចុះនេះ គឺដោយសារតែការឆ្លងរាលដាលនៃជំងឺកូវីដ១៩ ដែលបានធ្វើឲ្យប៉ះពាល់ដល់វិស័យអាកាសចរណ៍នៅទូទាំងសកលលោក និងធ្វើឲ្យប្រទេសជាច្រើនបិទប្រទេស ដើម្បីទប់ស្កាត់ការឆ្លងរីករាលដាលនៃជំងឺ ដ៏ កាចសាហាវមួយនេះ៕
រក្សាសិទ្ធិដោយ៖CEN
