ឈាបនដ្ឋានមួយ នៅក្នុងវត្ត បាងណាមឈុន ស្រុកធុនបុរី ទីក្រុងបាងកក បានរងការទ្រុឌទ្រោមរហូតបាក់រលំ ដោយសារបូជាសពអ្នកស្លាប់ពីជំងឺកូវីដ-១៩ ក្នុងមួយថ្ងៃៗឥតឈប់ឈរ។
នេះបើយោងតាមគណនីហ្វេសប៊ុកឈ្មោះ Nim Kow Bo បានបង្ហាញពីស្ថានភាពនៃឈាបនដ្ឋាន ស្ថិតនៅក្នុងវត្ត បាង ណាមឈុន ដែលជាទីកន្លែងសម្រាប់ទទួលបូជាសពអ្នកជំងឺកូវីដ-១៩ រហូតទ្រុឌទ្រោមខ្លាំង មិនអាចបន្តបូជាទៀតបាន។
ក្នុងនោះ ម្ចាស់គណនីខាងលើ បានរៀបរាប់យ៉ាងដូច្នេះថា៖ «ដុតរហូតដល់ឡផ្ទុះ! ហេតុនេះ យើងខ្ញុំសូមអំពាវនាវដល់សប្បុរសជន ចូលរួមបរិច្ចាគដើម្បីកសាងឈាបនដ្ឋានថ្មីជាបន្ទាន់ នៅក្នុងវត្ត បាង ណាមឈុន ស្រុកធុនបុរី ទីក្រុងបាងកក បន្ទាប់ពីឈាបនដ្ឋានចាស់បានរងការខូចខាតយ៉ាងធ្ងន់ធ្ងរ ដោយសារបូជាសពអ្នកជំងឺកូវីដ-១៩ ឥតឈប់ឈរ»។
តែទោះយ៉ាងណា ឈាបនដ្ឋាននេះ បាននិងកំពុងប្រើប្រាស់អស់រយៈពេល ២៥ ឆ្នាំ មកហើយ ហេតុនេះ វត្តត្រូវការកសាងថ្មីមួយ ដែលត្រូវចំណាយថវិកាសម្រាប់សាងសង់ប្រមាណ 5,468,000 បាត៕ រក្សាសិទ្ធិដោយ៖ លឹម ហុង
