ភ្នំពេញ ៖ មានអគ្គិភ័យមួយ ឆេះរថយន្តក្នុងចំណតរបស់ក្រុមហ៊ុនវីរៈប៊ុនថាំ ដែរមានទីតាំងស្ថិតនៅខាងកេីតគល់ស្ពានជ្រោយចង្វារ ខណ្ឌជ្រោយចង្វារ ។ រថយន្តពន្លត់អគ្គិភ័យជាច្រេីនចេញជួយអន្តរាគមន៍ពន្លត់អគ្គិភ័យយ៉ាងសកម្ម ហើយករណីនេះឆេះរថយន្តដឹកអ្នកដំណើរវីរៈប៊ុនថាំ ចំនួន ២៣ គ្រឿង និងស្លាប់មនុស្សចំនួន ០១ នាក់។
នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានឲ្យដឹងថា នៅវេលាម៉ោង ១៥និង៣០ នាទីរសៀល ថៃ្ងសុក្រទី៣០ ខែកក្កដា ឆ្នាំ២០២១ មានករណីអគ្គិភ័យមួយកន្លែងបានកើតឡើង នៅចំណតរថយន្តវីរៈប៊ុនថាំ ដែលស្ថិតនៅដីឡូតិ៍គ្មានលេខ ផ្លូវលំ ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដែលមានម្ចាស់ទីតាំងឈ្មោះ ស៊ួ វីរៈ ភេទ ប្រុស អាយុ ៥៥ ឆ្នាំ មុខរបរ ម្ចាស់ក្រុមហ៊ុនវីរៈប៊ុនថាំ ។
យោងតាមប្រភពពីកម្មករ បម្រើការងារនៅក្នុងក្រុមហ៊ុនដឹកអ្នកដំណើរវីរៈប៊ុនថាំបានឲ្យដឹងថា ដំបូងដោយមានភ្លើងឆេះពីក្នុងរថយន្ត១គ្រឿង រួចពួកគាត់បានទាញបំពង់ពន្លត់អគ្គិភ័យ ជួយបាញ់ទប់ស្កាត់បន្ទាប់មកក៏ទាក់ទងទៅសមត្តកិច្ចមូលដ្ឋាន សង្កាត់ជ្រោយចង្វារ សុំរថយន្តពន្លត់អគ្គិភ័យមកជាបន្ទាន់។
បន្ទាប់ពីខាងបង្ការពន្លត់អគ្គីភ័យ នៃស្នងការរាជធានីភ្នំពេញ ទទួលដំណឹងថា មានករណីអគ្គិភ័យកំពុងតែឆាប់ឆេះឃ្លាំងរថយន្តដឹកទំនិញ របស់ក្រុមហ៊ុនវីរៈប៊ុនថាំ នៅខណ្ឌជ្រោយចង្វារ ក៏បានចេញរថយន្តមកជាច្រើនគ្រឿង មកជួយបាញ់ពន្លត់។
នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ បានឲ្យដឹងថា ករណីនេះពុំទាន់ដឹងមូលហេតុនៅឡើយ គឺកំពុងបន្តការស្រាវជ្រាវ ។ ខូចខាតសម្ភារ ឆេះរថយន្តដឹកអ្នកដំណើរវីរៈប៊ុនថាំ ចំនួន ២៣ គ្រឿង និងពុំបានឆេះរាលដាលដល់ផ្ទះអ្នកជិតខាងឡើយ និងបណ្តាលឲ្យស្លាប់មនុស្សចំនួន ០១ នាក់ (ពុំទាន់ស្គាល់អត្តសញ្ញាណ) ។
ប្រតិបត្តិការនេះ បានប្រើរថយន្តការិយាល័យអគ្គិភ័យ ចំនួន ២១ គ្រឿង ប្រេីប្រាស់ទឹកអស់ចំនួន ៦៣ រថយន្ត ស្មេីនឹង ២៥០ ម៉ែត្រគូប ។
រថយន្តជំនួយអន្តរាគមន៍ពន្លត់មាន – រថយន្តក្រសួងមហាផ្ទៃ ចំនួន ០២ គ្រឿង ប្រើប្រាស់ទឹកអស់ចំនួន ០៤ រថយន្ត សើ្មនឹង ២៤ ម៉ែត្រគូប ។ – រថយន្តក្រុមហ៊ុនOCICទីក្រុងជ្រោយចង្វារ ចំនួន ១០ គ្រឿង ប្រើប្រាស់ទឹកអស់ចំនួន ២០ រថយន្ដ សើ្មនឹង ៨០ ម៉ែត្រគូប ។ – រថយន្តទីក្រុងអូរឡាំព្យា ចំនួន ០២ គ្រឿង ប្រើប្រាស់ទឹកអស់ចំនួន ០៤ រថយន្ត សើ្មនឹង ១៦ ម៉ែត្រគូប ៕ រក្សាសិទ្ធិដោយ៖សាមេត
