Tuesday, June 25, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ពីរ​ខែ​ដំបូង​ឆ្នាំ​២០១៨ ភ្ញៀវទេសចរ​ជនជាតិ​ចិន មក​ទស្សនា​ខេត្ត​សៀមរាប​ក្នុង​ចំណាត់ថ្នាក់​លេខ​១

spot_img

​សៀមរាប​៖ ជាក់ស្តែង​ឆ្នាំ​២០១៧​កន្លងទៅនេះ ភ្ញៀវទេសចរ​ជាតិ និង​អន្តរជាតិ ចូល​មក​ទស្សនា​ខេត្តសៀមរាប មាន​ចំនួន ៥.៥៤៣.៤៣៥​នាក់ កើនឡើង​៩,៩៣% ក្នុងនោះ​ភ្ញៀវទេសចរ​ចិន មាន​ចំនួន​៩១០.១០៧​នាក់ ស្នើ​នឹង​៣៧,០៣%​។ ដោយឡែក​រយៈពេល​២​ខែ (​មករា និង​ខែកុម្ភៈ​) ក្នុង​ឆ្នាំ​២០១៨​កន្លងទៅ ខេត្តសៀមរាប ទទួលបាន​ភ្ញៀវទេសចរ​សរុប​ចំនួន ៨៥២.២៧៦​នាក់ ហើយ​ភ្ញៀវទេសចរ​បរទេស​មាន​ចំនួន​សរុប ៥៣៩.០៥៤​នាក់ ក្នុងនោះ ភ្ញៀវទេសចរ​ជនជាតិ​ចិន ចំនួន ២៣១.៨១១​នាក់ ស្ថិត​នៅ​ចំណាត់ ថ្នាក់​លេខ​១ ក្នុងចំណោម​ភ្ញៀវទេសចរ​ទាំងអស់​។​

​ជាមួយ​នឹង​កំណើន​នៃ​ភ្ញៀវ​ទេសចរ​ចិន​នោះ នៅ​ថ្ងៃ​ទី​២៧ ខែ​មីនា ឆ្នាំ​២០១៨​នេះ រដ្ឋបាល​ខេត្ត​សៀមរាប បាន​ចុះហត្ថលេខា​ចងសម្ព័ន្ធភាព ជាមួយ​តំបន់​រដ្ឋបាល​ពិសេស​ម៉ា​កាវ នៃ​សាធារណរដ្ឋ​ប្រជាមានិត​ចិន ដើម្បី​ជំរុញ​កំណើន​ភ្ញៀវ​ទេសចរ និង​ដៃគូ​ពាណិជ្ជកម្ម​។ ការចុះហត្ថលេខា​នេះ ត្រូវបាន​ធ្វើឡើង​ក្រោម​អធិបតីភាព​លោក​បណ្ឌិត ឃឹម ប៊ុន​សុង អភិបាលខេត្ត និង​លោក ឆួយ ស៊ឺអា​ន (Chui Sai On) នាយក​ប្រតិបត្តិ​តំបន់​រដ្ឋបាល​ពិសេស​ម៉ា​កាវ​។​

​លោក​បណ្ឌិត អភិបាលខេត្ត​សៀមរាប បាន​ថ្លែងថា តាមរយៈ​អនុស្សរណៈ​នៃ​ការយោគយល់​គ្នា ស្តីពី​ការចង​សម្ព័ន្ធមេត្រីភាព​រវាង​ខេត្ត​សៀមរាប និង​តំបន់​រដ្ឋបាល​ពិសេស​ម៉ា​កាវ នៃ​សាធារណរដ្ឋ​ប្រជាមានិត​ចិន​នេះ នឹង​ជំរុញ​កំណើន​ភ្ញៀវ​ទេសចរ និង​ដៃគូ​ពាណិជ្ជកម្ម​ជនជាតិ​ចិន ព្រោះ​ម៉ា​កាវ​ជា​ដែនដី​សម្បូរ​ភ្ញៀវទេសចរ និង​វិនិយោគិន​។​

​ទន្ទឹមគ្នានេះ រដ្ឋបាល​ខេត្ត​សៀមរាប បាន​ស្នើសុំ​ឲ្យមាន​ការផ្លាស់ប្តូ​រ​ពាណិជ្ជ​កម្ម ជំរុញ​ការអភិវឌ្ឍ​លើ​វិស័យ​ទេសចរណ៍ កសិកម្ម អប់រំ ហេដ្ឋារចនាសម្ព័ន្ធ ក្នុង​គោលដៅ​បង្កើន​កំណើន​សេដ្ឋកិច្ច​សង្គម និង​ការអភិវឌ្ឍ​សេដ្ឋកិច្ច​មូលដ្ឋាន តាមរយៈ​គម្រោង វិនិយោគ និង​ការតភ្ជាប់​ជើងហោះហើរ​ត្រង់​រវាង​តំបន់​រដ្ឋបាល​ពិសេស​ម៉ា​កាវ មក​កាន់​ខេត្ត​សៀមរាប​។​

​ក្នុងនាម​ក្រុមប្រឹក្សា គណៈ​អភិបាលខេត្ត លោក​បណ្ឌិត ឃឹម ប៊ុន​សុង បាន​សម្តែង​សេចក្តី​រីករាយ​ចំពោះ​ពិធី​ចុះហត្ថលេខា​ដ៏​មាន​អត្ថន័យ​នេះ និង​សូម​ថ្លែងអំណរគុណ​យ៉ាង​ជ្រាលជ្រៅ​ចំពោះ​រដ្ឋាភិបាល និង​ប្រជាជន នៃ​សាធារណរដ្ឋ​ប្រជាមានិត​ចិន ដែល​តែងតែ​គាំទ្រ និង​ជួយ​ឧបត្ថម្ភ​គ្រប់បែបយ៉ាង​ដល់​ប្រជាជន​កម្ពុជា នា​ពេលកន្លងមក ហើយ​នៅតែ​បន្ត​គាំទ្រ​ដល់​ការ​អភិឌ្ឍ​មាតុភូមិ​កម្ពុជា​ឲ្យមាន​ការរីកចម្រើន​ជា​បន្ត​បន្ទាប់​។​

​តាម​ការបញ្ជាក់​ពី​លោក​បណ្ឌិត ឃឹម ប៊ុន​សុង ខេត្តសៀមរាប​បាន​បង្កើត​ចំណង​សម្ព័ន្ធមេត្រីភាព​ជាមួយ​ខេត្ត​-​ក្រុង នៃ​សាធារណរដ្ឋ​ប្រជាមានិត​ចិន ចំនួន​២៣​ខេត្ត​-​ក្រុង​។ ផ្លែផ្កា​ដែល​កើតចេញ​ពី​ភាព​ជា​បងប្អូន​នេះ បាន​នាំមក​នូវ​ការរីកចម្រើន ថ្មី​ថែម​ទៀត ទើប​មាន​ក្រុមហ៊ុន​អាកាសចរ​ចំនួន​១២​ក្រុមហ៊ុន បាន​ធ្វើ​ការហោះហើរ​ត្រង់​ពី​ចិន​មក​សៀមរាប ក្នុង​ចន្លោះ​១២-១៥​ជើង​ក្នុង​មួយថ្ងៃ ទាំងនេះ​ជំរុញ ឲ្យមាន​ភ្ញៀវទេសចរ​កើនឡើង​ជា​បន្តបន្ទាប់ ជាពិសេស​គឺ​ភ្ញៀវទេសចរ​ជនជាតិ​ចិន​៕​ ​ដោយ​៖​បញ្ញា​ស័ក្តិ​

spot_img
×