ខេត្តរតនគិរី ៖ ក្នុងអំឡុង និងក្រោយ ជំងឺកូវីដ-១៩នេះ មន្ទីរទេសចរណ៍ខេត្តរតនគិរី បានត្រៀមអនុវត្តវិធាន សុវត្ថិភាពទាំង៧ របស់ក្រសួងទេសចរណ៍ ដែលរួមមាន ១- វិធានសុវត្ថិភាពសេវាកម្មដឹកជញ្ជូន ២- វិធានសេវាកម្មផ្លូវទឹកផ្លូវគោក ៣- វិធានសេវាកម្មស្នាក់នៅមានសណ្ឋាគារផ្ទះសំណាក់ ៤- វិធានសេវាកម្មម្ហូបអាហារ ៥- វិធានសុវត្ថិភាពតំបន់រមណីយដ្ឋាន ៦- វិធានសុវត្ថិភាពសហគមន៍អេកូទេសចរណ៍ និង ៧- វិធានសុវត្ថិភាពតំបន់ឆ្នេរដើម្បីស្ដារទាក់ទាញ និងទទួលភ្ញៀវទេសចរចូលមកកម្សាន្តក្នុង ខេត្តរតនគិរីឡើងវិញ ទាំងក្នុងកំលុងនិងក្រោយបញ្ចប់ជំងឺកូវីដ-១៩។
លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានឱ្យដឹងថា ខេត្តរតនគិរី នៅក្នុងបរិបទសម័យ កូវីដ១៩ ក្នុងឆ្នាំ២០២១នេះ ចំនួនភ្ញៀវទេសចរ មានជាង ៣ ម៉ឺននាក់ ថយចុះជិត ៦០ ភាគរយ បើធៀបទៅនឹងក្នុងអំឡុងឆ្នាំ២០២០ ដែលមានជាង១០ម៉ឺននាក់។
ខេត្តរតនគិរី មានតំបន់ទេសចរណ៍ជាច្រើនកន្លែង បែបធម្មជាតិ និងបែបកែច្នៃ ហើយបច្ចុប្បន្នអាជ្ញាធរ កំពុងតែចងក្រងទៅជា តំបន់ទេសចរណ៍សហគមន៍ និងតំបន់រមណីដ្ឋានបែបឯកជន ដែលមានតំបន់រមណីយដ្ឋានស្រុកចំនួន ២០រមណីយដ្ឋាន សម្រាប់បម្រើភ្ញៀវទេសចរ មកលេងកម្សាន្ត។
គួរបញ្ជាក់ថា ខេត្តរតនគិរី ជាប៉ូលសេដ្ឋកិច្ចទី ៤ ដែលរាជរដ្ឋាភិបាលកម្ពុជា បានកំណត់ជាច្រកសំខាន់ បន្ទាប់ពីរាជធានីភ្នំពេញ ខេត្តសៀមរាប និងតំបន់ឆ្នេរ។ ខេត្តរតនគិរី ជាខេត្តដែលមានសក្ដានុពល លើវិស័យកសិឧស្សាហកម្ម វិស័យកសិទេសចរណ៍ និងវិស័យអេកូទេសចរណ៍ជាដើម៕
រក្សាសិទ្ធិដោយ៖CEN