ប្រិយមិត្តបានស្គាល់ច្បាស់ហើយ កំពូលអ្នកសារព័ត៌មាន ដែលគ្រប់គ្នាហៅថា ពូហ៊នៗ ដែលល្បីឈ្មោះខ្លាំង បន្ទាប់ពីចាប់ផ្តើមចេញមុខឡាយព័ត៌មាននិយាយបែបកំប្លែងៗ និងលក្ខណៈពិបាកស្តាប់ជាខ្លាំង តែសម្រាប់មនុស្សជាច្រើននៅតែចូលចិត្តតាមដានប្រុសហ៊ន។
ដោយឡែក ថ្មីៗនេះ កំពូលអ្នកសារព័ត៌មានរូបនេះ ស្រាប់តែបានជួបរឿងដ៏មិននឹកស្មានជាលើកទី១ ត្រូវក្រុមកាងល្បែងជល់មាន់់ និងអាប៉ោង ប្រើអំពើហិង្សាព្រួតវាយឡើងប៉ោងមុខប៉ោងមាត់ និងរត់ចោលក្បាលមេក្រូ ទាំងភ័យស្លន់ស្លោ រកដកខ្យល់សឹងពុំរួច បន្ទាប់ពីគាត់បានចុះទៅផ្សាយព័ត៌មានទីតាំងលួចជល់មាន់នៅឯវាលស្រែមួយកន្លែង ស្ថិតនៅក្នុងទឹកដីខេត្តព្រៃវែង។
ពូហ៊ន ក៏បានបញ្ជាក់ពីករណីប្រើអំពើហិង្សាដ៏សាហាវនេះ តាមរយៈទំព័រហ្វេសប៊ុករបស់ខ្លួនឲ្យដឹងថា ក្រុមអ្នកញៀនល្បែងជល់មាន់ និងអាប៉ោង បានកំពុងនាំគ្នាលេងល្បែងស៊ីសងទាំងនេះយ៉ាងគគ្រឹកគគ្រេង ដោយគ្មានខ្លាចមន្ត្រីអាជ្ញាធរសោះឡើយ និងជាពិសេសមិនគោរពតាមបំរាមរបស់ប្រមុខរាជរដ្ឋាភិបាល និងព្រមទាំងវាយទៅលើអ្នកសារព័ត៌មាន បណ្ដាលឱ្យបែកទូរស័ព្ទ និងរបួសស្រាលលើរូបលោកផងដែរ នៅថ្ងៃទី៧ ខែសីហា ឆ្នាំ២០២១ នេះ៕ រក្សាសិទ្ធិដោយ៖ លឹម ហុង
