រដ្ឋធានីវ៉ាស៊ីនតោន ៖ មជ្ឈមណ្ឌលគ្រប់គ្រង និងបង្ការជំងឺឆ្លងរបស់សហរដ្ឋអាមេរិក ហៅកាត់ CDC បានព្រមានដល់ពលរដ្ឋអាមេរិកាំងទាំងអស់ មិនឲ្យធ្វើដំណើរទៅកាន់ប្រទេសថៃ ដោយសារស្ថានភាពជំងឺកូវីដ-១៩ នៅក្នុងប្រទេសនេះ មានការឆ្លងរាលដាលកាន់តែខ្លាំងឡើង។ នេះបើតាមសារព័ត៌មានថៃ The Nation បានចេញផ្សាយ កាលពីថ្ងៃទី១០ ខែសីហា ឆ្នាំ២០២១។
មជ្ឈមណ្ឌលគ្រប់គ្រង និងបង្ការជំងឺឆ្លងរបស់សហរដ្ឋអាមេរិក ហៅកាត់ CDC បានចេញសេចក្តីជូនដំណឹង ស្តីពីសុខភាពធ្វើដំណើរកម្រិត៤ សម្រាប់ប្រទេសថៃ ហើយ CDC ក៏បានបង្ហាញ អំពីហានិភ័យខ្ពស់ ពីជំងឺកូវីដ-១៩។ ក្រៅពីនេះ CDC ក៏បានណែនាំថា «ហានិភ័យរបស់អ្នក ក្នុងការឆ្លងជំងឺកូវីដ-១៩ និងការវិវឌ្ឍទៅជារោគសញ្ញាធ្ងន់ធ្ងរ អាចទាប ប្រសិនបើអ្នកបានចាក់វ៉ាក់សាំង គ្រប់ដូសពេញលេញជាមួយវ៉ាក់សាំងមានការអនុញ្ញាតពីរដ្ឋបាលចំណីអាហារ និងឱសថរបស់សហរដ្ឋអាមេរិក ហៅកាត់ FDA ។
CDC ក៏បានក្រើនរំឭក ដល់ពលរដ្ឋរបស់ខ្លួនថា មុននឹងមានគម្រោងធ្វើដំណើរកាន់ប្រទេសណាមួយ សូមពិនិត្យមើលការណែនាំ ជាក់លាក់របស់ CDC សម្រាប់អ្នកដំណើរ ដែលទទួលថ្នាំបង្ការ និងអ្នកមិនទាន់ទទួលបានការចាក់វ៉ាក់សាំង»។
ស្របគ្នានេះដែរ ក្រសួងការបរទេសហរដ្ឋអាមេរិក ក៏បានក្រើនរំឭកដល់ពលរដ្ឋរបស់ខ្លួនថា ពលរដ្ឋអាមេរិកាំងទាំងអស់ គួរតែគិតពិចារណា លើការធ្វើដំណើរទៅកាន់ខេត្ត Yala, Pattani, Narathiwat និងខេត្តសុងខ្លា (Songkhla) ។ នៅភាគខាងត្បូងប្រទេសថៃ នេះជាទីកើតភាពវឹកវរខាងស៊ីវិល។
សេចក្តីថ្លែងការណ៍នោះ បានបញ្ជាក់ថា «អំពើហិង្សាតាមកាលកំណត់ ភាគច្រើន ផ្តោតលើផលប្រយោជន៍របស់រដ្ឋាភិបាលថៃ។ ការបះបោរក្នុងស្រុក នឹងបន្តប៉ះពាល់ដល់សន្តិសុខ នៅក្នុងខេត្តយ៉ាឡា, ប៉ាត់តានីណារ៉ាធីវ៉ាត និងខេត្តសុងក្លា។ ជាមួយគ្នានេះ ពលរដ្ឋអាមេរិក អាចប្រឈមនឹងការស្លាប់ ឬរបួស ដោយសារការវាយប្រហារ មិនរើសមុខ នៅកន្លែងសាធារណៈ បើទោះជាច្បាប់អាជ្ញាសឹក នៅក្នុងតំបន់នេះបានចូលជាធរមានហើយក្ដី»។
ក្រសួងការបរទេសហរដ្ឋអាមេរិក បានបន្ថែមថា រដ្ឋាភិបាលអាមេរិក បានកំណត់លទ្ធភាព សម្រាប់ការជួយជាបន្ទាន់ ដល់ពលរដ្ឋអាមេរិកាំង នៅក្នុងខេត្តទាំងនេះ ព្រោះបុគ្គលិករដ្ឋាភិបាលអាមេរិក ត្រូវទទួលបានការអនុញ្ញតយ៉ាងពិសេស សម្រាប់ការធ្វើដំណើរទៅកាន់បណ្ដាខេត្តខាងលើ។
គិតត្រឹម ថ្ងៃទី១១ ខែសីហា ឆ្នាំ២០២១ ថៃមានអ្នកឆ្លងកូវីដ សរុប ៨១៦ ៩៨៩នាក់ ហើយក្នុងនោះមានអ្នកស្លាប់ ៦ ៧៩៥នាក់ និង មានអ្នកជាសះស្បើយ ៦០០ ១៥២នាក់៕ រក្សាសិទ្ធិដោយ៖សារាយSN
