មនុស្សប្រហែល ៤៦នាក់បានស្លាប់ និង ៤៦នាក់ផ្សេងទៀតរងរបួសនៅក្នុងហេតុការណ៍ផ្ទុះ រោងចក្រផលិតកាំជ្រួចនៅក្នុងប្រទេសឥណ្ឌូនេស៊ី។ នេះបើតាមការចេញផ្សាយរបស់សារព៌តមានប៊ីប៊ីស៊ី (BBC) នៅយប់ថ្ងៃព្រហស្បតិ៍ម្សិលមិញនេះ។
មនុស្សចំនួន ១០ផងដែរបានបាត់ខ្លួននៅក្នុងហេតុការណ៍ដ៍រន្ធត់នេះ។
ហេតុការណ៍ផ្ទុះ និងបង្កជាភ្លើងឆេះបានចាប់ផ្តើមនៅម៉ោងប្រហែល ៩ព្រឹក (ម៉ោងនៅឥណ្ឌូនេស៊ី) នៅតំបន់ឧស្សាហ៍កម្ម ក្នុងទីក្រុង Tangerang នៃខេត្ត Banten។
ប៉ូលីសបាននិយាយថា សាកសពជាច្រើនត្រូវបានគេឃើញប្រមូលផ្តុំគ្នានៅខាងក្រោយរោងចក្រ ដោយគេជឿជាក់ថា ជនរងគ្រោះទាំងអស់ព្យាយាមរត់គេពីអណ្តាតភ្លើងតែមិនបានសម្រេច។
បើតាមអ្នកពន្លត់អគ្គិភ័យម្នាក់ឈ្មោះ Oni Sahroni បានថ្លែងប្រាប់ទូរទស្សន៍ Metro ឥណ្ឌូនេស៊ីថា ជនរងគ្រោះទាំងអស់ដែលស្លាប់ត្រូវគេមើលលែងស្គាល់ ដោយសារតែពួកគេត្រូវភ្លើងឆេះខ្លោច។
បើ់តាមសាក្សីបានបញ្ជាក់ថា មានការផ្ទុះចំនួន ២ដងនៅក្នុងរោងចក្រ។
មន្ត្រីរដ្ឋាភិបាលម្នាក់បានថ្លែងប្រាប់ទូរទស្សន៍ Metro ថា រោងចក្រផលិតកាំជ្រួចនោះទើបតែបើកដំណើរការបានតែ ៦សប្តាហ៍ប៉ុណ្ណោះ។
ប្រជាជនម្នាក់ដែលរស់នៅតំបន់កើតហេតុបាននិយាយថា គាត់បានលឺសូរសម្លេងផ្ទុះ និងសូរសម្លេងស្រែកយំរបស់មនុស្សនៅក្នុងរោងចក្រ។
ប៉ូលីសពុំទាន់ដឹងច្បាស់ពីមូលហេតុបណ្តាលឲ្យផ្ទុះនៅឡើយទេ៕ ដោយ ៖ សុភ័ក្ត្រ
