ភ្នំពេញ ៖ មន្ត្រី ៣នាក់ នៃក្រសួងយុត្តិធម៌ ត្រូវបានធ្វើតេស្តរកឃើញឆ្លងជំងឺកូវីដ-១៩ ក្នុងចំណោមការធ្វើតេស្តរហ័ស ទៅលើមន្រ្តីនៃស្ថាប័ននេះ ជិត ៥០០នាក់ ត្រូវបានក្រុមគ្រូពេទ្យនាំយកទៅ កាន់មន្ទីរព្យាបាលប្រកបដោយសុវត្ថិភាពហើយ។
អនុវត្តតាមសារាចរណែនាំរបស់រាជរដ្ឋាភិបាល, ក្រសួងយុត្តិធម៌ នាព្រឹកថ្ងៃទី១១ ខែសីហា ឆ្នាំ២០២១ បានរៀបចំការធ្វើតេស្តរហ័សរកមេរោគកូវីដ-១៩ ជូនថ្នាក់ដឹកនាំ និងមន្ត្រីរាជការនៃក្រសួងយុត្តិធម៌ នៅទីស្តីការក្រសួងយុត្តិធម៌ និងនៅតាមបណ្ដាអង្គភាពទាំងអស់ចំណុះក្រសួង ដែលមានការចូលរួមពីក្រុមមន្ត្រី សរុបចំនួន ៤៩៤រូប , ក្នុងនោះ ក៏ត្រូវបានរកឃើញមន្ត្រី ៣នាក់មានឆ្លងជំងឺកូវីដ-១៩។
បើតាមក្រុមគ្រូពេទ្យជំនាញប្រាប់ថា មន្ត្រីទាំង ៣នាក់ នេះ ដែលត្រូវបានរកឃើញ វិជ្ជមានកូវីដ-១៩ ពុំបានចាប់អារម្មណ៍ថា ខ្លួនមានផ្ទុកមេរោគកូវីដ-១៩ នោះឡើយ ដោយសារពុំមានរោគសញ្ញា ហើយក៏ពុំបានដឹងថា ធ្លាប់មានទំនាក់ទំនងដោយផ្ទាល់ ជាមួយនឹងអ្នកវិជ្ជមានកូវីដ-១៩រូបណានោះដែរ៕ រក្សាសិទ្ធិដោយ៖ពិសិដ្ឋ CEN
