រដ្ឋធានីវ៉ាស៊ីនតោន ៖ បច្ចុប្បន្ន ស្រ្ដីមានផ្ទៃពោះជាច្រើន នៅតែអាល់អែក និង មានក្ដីកង្វល់ អំពីសុវត្ថិភាព នៃការចាក់វ៉ាក់សាំង ដោយសារការភ័យខ្លាចប៉ះពាល់ដល់ទារក ប៉ុន្ដែ CDC របស់សហរដ្ឋអាមេរិក បានចេញមុខមកអះអាងថា ស្រ្ដីមានផ្ទៃពោះ អាចចាក់វ៉ាក់សាំងបង្ការកូវីដ-១៩បាន ប្រកបដោយសុវត្ថិភាព។
សារព័ត៌មានសិង្ហបុរី CNA បានចេញផ្សាយ កាលពីថ្ងៃទី១២ ខែសីហា ឆ្នាំ២០២១ ថា មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បានឲ្យដឹង កាលពីថ្ងៃទី១១ ខែសីហា ថា ស្រ្ដីមានផ្ទៃពោះ អាចទទួលការចាក់វ៉ាក់សាំងបង្ការកូវីដ-១៩បាន ដោយសារសុវត្ថិភាព។ បើផ្អែកលើការវិភាគ កាលពីពេលថ្មីៗនេះ រកឃើញថា វ៉ាក់សាំងបង្ការកូវីដ-១៩ មិនបង្កឲ្យគ្រោះថ្នាក់ដល់ការរលូតកូនទេ។
មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បានបញ្ជាក់ថា CDC រកឃើញថា បើតាមការវិភាគ ឬការសិក្សា មិនមានការព្រួយបារម្ភ ពីសុវត្ថិភាព សម្រាប់ស្រ្ដីមានផ្ទៃពោះ។ ចំណែកអត្រារលូតកូន ក្រោយការចាក់វ៉ាក់សាំង បង្ការកូវីដ-១៩ មិនមានដែរ។ ដូច្នេះស្រ្ដីមានផ្ទៃពោះ អាចទទួលការចាក់វ៉ាក់សាំងណាមួយ ក៏បាន រួមមាន Pfizer, Moderna និង Johnson & Johnson ។
មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បានបន្ដថា ការមានផ្ទៃពោះ បង្កើនហានិភ័យធ្ងន់ធ្ងរ ពីជំងឺកូវីដ-១៩ ហើយការកើតជំងឺ-១៩ នៅក្នុងអំឡុងពេលមានផ្ទៃពោះ ក៏បង្កើនហានិភ័យ ពីការកើតមិនគ្រប់ខែ។ CDC ក៏បានណែនាំដល់កុមារ ដែលមានអាយុ១២ឆ្នាំ និង អ្នកមានអាយុច្រើនជាងនេះ ទៅទទួលការចាក់វ៉ាក់សាំងបង្ការកូវីដ-១៩ ដោយរួមទាំងស្រ្ដីមានផ្ទៃពោះ ស្រ្ដីកំពុងបំបៅដោះកូន ស្រ្ដីដែលកំពុងព្យាយាមឲ្យមានផ្ទៃពោះ ឬស្រ្ដីអាចនឹងមានផ្ទៃពោះ នាពេលខាងមុខ។
មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) កាលពីពេលមុន មិនបានណែនាំដល់ស្រ្ដីមានផ្ទៃពោះ ឲ្យទៅទទួលការចាក់វ៉ាក់សាំងនោះឡើយ។ ប៉ុន្ដែភ្នាក់ងារសុខាភិបាលមួយនេះ គ្រាន់តែប្រាប់ថា ស្រ្ដីមានផ្ទៃពោះអាចពិភាក្សាការចាក់វ៉ាក់សាំងនេះ ជាមួយអ្នកផ្ដល់សេវាសុខភាពរបស់ពួកគេតែប៉ុណ្ណោះ៕រក្សាសិទ្ធិដោយ៖សារាយSN
