លោកស្រីកិត្តិសង្គហបណ្ឌិត ម៉ែន សំអន បានណែនាំទៅដល់ក្រុមគ្រូពេទ្យទាំងអស់ ជាពិសេសក្រុមគ្រូពេទ្យដែលចុះបំពេញបេសកកម្មចាក់វ៉ាក់សាំងនៅក្នុងខេត្តស្វាយរៀង នៅពេលដែលចប់បេសកកម្មនៅខេត្តស្វាយរៀង ហើយត្រូវបន្តទៅខេត្តណាផ្សេងទៀត សូមរក្សានូវក្រមសីលធម៌វិជ្ជាជីវៈរបស់មន្ត្រីសុខាភិបាលឱ្យល្អខ្ជាប់ខ្ជួន ធ្វើជាមន្ត្រីល្អក្នុងការបម្រើសេវាសាធារណៈជូនប្រជាពលរដ្ឋ។
ការលើកឡើងបែបនេះរបស់ លោកស្រីកិត្តិសង្គហបណ្ឌិត ម៉ែន សំអន ធ្វើឡើងនៅរសៀលថ្ងៃទី ១៣ ខែសីហា ឆ្នាំ ២០២១ ក្នុងពេលជួបសំណេះសំណាលជាមួយក្រុមគ្រូពេទ្យស្ម័គ្រចិត្ត លោក ហ៊ុន ម៉ានី ដែលបានចុះមកចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋខេត្តស្វាយរៀង។ ក្រុមគ្រូពេទ្យក៏បានទទួលអំណោយពី លោកស្រីកិត្តិសង្គហបណ្ឌិត ម៉ែន សំអន រួមមាន ថវិកាក្នុងម្នាក់ៗ ១៣ម៉ឺនរៀល អង្ករ ២០គីឡូក្រាម ទឹកត្រី ១យួរ ត្រីខ ១០កំប៉ុង នំអន្សម ១ ។
លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តស្វាយរៀង បានកោតសសើរ និងថ្លែងអំណរគុណដល់ លោក ហ៊ុន ម៉ានី ដែលបានចាត់តាំងឱ្យក្រុមគ្រូពេទ្យស្ម័គ្រចិត្តចុះទៅតាមបណ្ដារាជធានី-ខេត្តផ្សេងៗ បំពេញបេសកកម្មចាក់វ៉ាក់សាំងជូនប្រជាពលរដ្ឋ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ គិតគូរសុខភាពសាធារណៈ និងស្ដារសេដ្ឋកិច្ច-សង្គមឡើងវិញ៕ ពិសិដ្ឋ CEN
