ភ្នំពេញ : សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បង្ហាញអំពីលទ្ធផលនៃកិច្ចប្រតិបត្តិការបង្ក្រាបបទល្មើសគ្រឿងញៀន ក្នុងខែកក្កដា ឆ្នាំ២០២១ សមត្ថកិច្ចចាប់យកគ្រឿងញៀនជាង ២១៩គីឡូក្រាម និងបង្ក្រាបបានបទល្មើសគ្រឿងញៀនសរុបចំនួន ៣២៩ករណី គឺមានការថយចុះ ៤៨ករណី បើធ្វើការប្រៀបធៀបនឹងខែមិថុនា។ បទល្មើសបង្ក្រាបរួមមានៈ ករណីជួញដូរ រក្សាទុក ២៤២ករណី, ករណីប្រើប្រាស់ ៨៤ករណី, ករណីសំយោគ កែច្នៃ ១ករណី និងករណីដាំដុះ ២ករណី។ នេះបើយោងតាមទំព័រហ្វេសប៊ុករបស់សម្តេចក្រឡាហោម ស ខេង កាលពីថ្ងៃទី១៣ ខែសីហា ឆ្នាំ២០២១។
សម្តេចក្រឡាហោមបានបន្តថា ពាក់ព័ន្ធនឹងករណីខាងលើនេះ មានជនសង្ស័យសរុបចំនួន ៨៤៩នាក់ ត្រូវបានឃាត់ខ្លួន កើន៤៧នាក់ ស្មើនឹង ៥,២ភាគរយ ធៀបនឹងខែមិថុនា ឆ្នាំ២០២១។ ជនសង្ស័យទាំងនោះ ពាក់ព័ន្ធនឹងករណីជួញដូរ និងរក្សាទុក ៥១០នាក់, ករណីប្រើប្រាស់គ្រឿងញៀន ៣៣១នាក់, ករណីសំយោគ និងកែច្នៃ ៥នាក់ និងករណីដាំដុះ៣នាក់។ ជនសង្ស័យទាំងនោះ មានខ្មែរ ៧៧៦នាក់ និជនបរទេស ៧៣នាក់។
សម្តេចក្រឡាហោម ស ខេង បានបញ្ជាក់ថា ការបង្ក្រាបបទល្មើសគ្រឿងញៀនក្នុងខែកក្កដា ឆ្នាំ២០២១នេះ សមត្ថកិច្ចបានចាប់យកគ្រឿងញៀនសរុបចំនួន ២១៩គីឡូក្រាម និង៤៦០.៧១ក្រាម។ ថ្វីដ្បិតថាការបង្ក្រាបបទល្មើសមានការថយចុះធៀបនឹងខែមិថុនា ប៉ុន្តែចំនួនគ្រឿងញៀនដែលសមត្ថកិច្ចបង្ក្រាបបាន មានការកើនឡើងដល់ទៅ ៧៣គីឡូក្រាម ដែលស្មើនឹងប្រមាណជាង៥០ភាគរយធៀបនឹងខែមុន។ គ្រឿងញៀនទាំងនោះ រួមមានៈ មេតំហ្វេតាមីនក្រាមម្សៅ (ICE)ជាង៥៥គីឡូក្រាម, មេតំហ្វេតាមីនគ្រាប់ (WY)ចំនួន១១៣.៣០ក្រាម, អ៊ិចស្តាស៊ី (MDMA)១០២គីឡូក្រាម៣៧៩.៩០ក្រាម, កេតាមីន ២១គីឡូក្រាម ២៣៧.៤០ក្រាម, ហេរ៉ូអ៊ីន ៥.១៦ក្រាម, កាទីណូន ៣៩គីឡូក្រាម ៨៥៤ក្រាម ព្រមទាំងសារធាតុគីមីផ្សំ ១១២១គីឡូក្រាម, កញ្ឆាស្រស់១៥៦៥ដើម និងកញ្ឆាស្ងួត ៣៦គីឡូក្រាម ២២៧ក្រាម។
សម្តេចក្រឡាហោម ស ខេង បានបន្តថា ក្នុងនាមសម្ដេចតេជោនាយករដ្ឋមន្ត្រី ក្នុងនាមក្រសួងមហាផ្ទៃ និងខ្លួនសម្តេចផ្ទាល់ សូមផ្ញើនូវសេចក្ដីកោតសរសើរ និងការលើកទឹកចិត្តខ្ពស់ ជូនចំពោះថ្នាក់ដឹកនាំ និងមន្ត្រីពាក់ព័ន្ធទាំងអស់ ទាំងស៊ីវិល នគរបាល និងកងរាជអាវុធហត្ថ ដែលបានរួមសហការគ្នាយ៉ាងល្អ ក្នុងកិច្ចប្រតិបត្តិការបង្ក្រាបបទល្មើសគ្រឿងញៀន ដើម្បីរួមចំណែកការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ជូនជាតិ និងប្រជាជន។
ជាថ្មីម្ដងទៀត សូមផ្ញើសារជូនជនរួមជាតិ គ្រប់មជ្ឈដ្ឋានសង្គម និងកម្លាំងអនុវត្តច្បាប់ទាំងអស់ សូមចូលរួមគាំទ្រ និងអនុវត្តពាក្យស្លោកជាតិ ៣ការពារ ១រាយការណ៍ គឺ៖ កុំពាក់ព័ន្ធ ៖ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន ។ កុំអន្តរាគមន៍ ៖ កុំរារាំងការរអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫ មិត្តភក្កិក៏ដោយ ។ កុំលើកលែង ៖ កុំបន្ធូរបន្ថយការអនុត្តច្បាប់ចំពោះឧក្រិដ្ឋជនគ្រឿងញៀន។ សមត្ថកិច្ចពាកព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវៈរបស់ខ្លួន ហើយជនគ្រប់រូបត្រូវគោរព និងអនុវត្តច្បាប់ ។ មួយរាយការណ៍ ៖ ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច …ដើម្បីយើងអាចបន្តរួមកម្លាំងសាមគ្គីជាតិ ប្រយុទ្ធប្រឆាំងគ្រឿងញៀន ដែលជាសត្រូវនៃការអភិវឌ្ឍសេដ្ឋកិច្ច សង្គម និងធនធានមនុស្ស ជាពិសេសធនធានយុវជន ដែលជាសសរទ្រូងប្រទេសជាតិ៕ រក្សាសិទ្ធិដោយ៖ចេស្តារ
